ബാജിയുടെ കുറിപ്പുകള്‍

കാമലസ് ഷോര്‍ട്ട് ഫിലിം KAMALES a Short Fiim by Baji Odamveli

2011-01-26T10:57:00.007+03:00

കാമലസ് ഷോര്‍ട്ട് ഫിലിം ഒന്നാം ഭാഗം

http://www.youtube.com/watch?v=OYYywQook2w

കാമലസ് ഷോര്‍ട്ട് ഫിലിം രണ്ടാം ഭാഗം

http://www.youtube.com/watch?v=LV-sKt65j9U

കണ്ട് അഭിപ്രായം അറിയിച്ചാല്‍ സന്തോഷം...
ബാജി ഓടംവേലി
സംവിധായകന്‍

കാമലസ് / Kamales a short film by Baji Odamveli

2010-12-20T12:02:00.005+03:00

ഒട്ടകപഷിയുടെ ശാസ്‌ത്രീയ നാമത്തില്‍ നിന്നുമാണ്‍ കാമലസ് എന്ന പേര്‍ സ്വീകരിച്ചത്. ഒട്ടകപക്ഷി നയം എന്ന പ്രയോഗം നാം കേട്ടിട്ടുണ്ട്, ഓടിയൊളിക്കാനുള്ള വ്യഥാ ശ്രമത്തെ സൂചിപ്പിക്കുന്ന അതിരൂക്ഷമായ പരിഹാസമാണ് ഈ പ്രയോഗത്തിന്റെ കാതല്‍. ശത്രുക്കളില്‍ നിന്ന് രക്ഷനേടാന്‍ ഒട്ടകപ്പക്ഷികള്‍ സ്വീകരിക്കുന്ന ഒരു മാര്‍ഗമുണ്ടത്രെ. മറ്റാരും കാണാതിരിക്കാന്‍ തല മണ്ണില്‍ പൂഴ്ത്തി ഇരിക്കും. അങ്ങനെ ഇരുന്നാല്‍ തന്നെ ആരും കാണുന്നില്ല എന്നാണ് ആ പക്ഷിയുടെ വിചാരം. തല മണ്ണില്‍ പൂഴ്ത്തുമ്പോള്‍ താന്‍ മുന്നിലുള്ളതൊന്നും കാണുന്നില്ല എന്നതല്ലാതെ തന്നെ ആരും കാണാതിരിക്കുന്നില്ല എന്ന സത്യം പാവം ഒട്ടപക്ഷിക്ക് അറിയില്ല പോലും.

ഒത്തിരി പ്രശ്‌നങ്ങളില്‍ നിന്നും ഓടി ഒളിക്കാനായി, സമൂഹവുമായുള്ള എല്ലാ ബന്ധങ്ങളും ഉപേക്ഷിക്കുന്ന അന്തര്‍മുഖനായ ഒരു മനുഷ്യന്റെയും നിസ്സഹായരായ അയാളുടെ കുടുംബത്തിന്റെയും കഥ പറയുന്നു കാമലസ്.

ostrich - a person who refuses to face reality or recognize the truth (a reference to the popular notion that the ostrich hides from danger by burying its head in the sand)
According to African folklore, an ostrich prefer to close its eyes and hide its head in a bush or hole in the ground when facing danger. Since the ostrich can no longer see the danger, it believes that the danger no longer exist and that it is safe from the consequences of the danger, whilst the bulk of its body remains in the open and thus vulnerable to the original danger. An Ostrich Policy is therefore the inability to act appropriately to avert danger or the inevitable consequences thereof.

സമാജം കഥ - കവിതാ പുരസ്കാരം - 2010

2010-09-18T17:39:00.001+03:00

ബഹറിന്‍ കേരളീയ സമാജം
സാഹിത്യ വിഭാഗം

സമാജം കഥ - കവിതാ പുരസ്കാരം - 2010

ഗൾഫ്‌ മലയാളികളുടെ സർഗ്ഗവാസനകൾ കണ്ടെത്തുന്നതിനും പ്രോത്സാഹിപ്പിക്കുന്നതിനുമായി ബഹറിന്‍ കേരളീയ സമാജം സാഹിത്യവിഭാഗം - 'സമാജം കഥ / കവിതാ പുരസ്കാരം - 2010' എന്ന പേരിൽ കഥ - കവിത മത്സരം സംഘടിപ്പിക്കുന്നു. അയ്യായിരം രൂപയും ഫലകവും പ്രശസ്‌തി പത്രവുമാണ്‌ ഓരോ വിഭാഗത്തിലേയും സമ്മാനം. പങ്കെടുക്കാൻ ആഗ്രഹിക്കുന്നവർ തങ്ങളുടെ സൃഷ്ടികൾ 2010 സെപ്‌റ്റംബർ 20 തിങ്കളാഴ്‌ചക്കു മുൻപായി ബഹറിൻ കേരളീയ സമാജം, പി.ബി. നമ്പർ. 757, മനാമ, ബഹറിൻ എന്ന വിലാസത്തിലോ bksaward@gmail.com എന്ന ഇ മെയിൽ വിലാസത്തിലോ അയയ്ക്കുവാൻ താത്പര്യപ്പെടുന്നു. കവറിനു മുകളിൽ - 'സമാജം കഥ / കവിതാ പുരസ്കാരം - 2010'എന്ന് പ്രത്യേകം രേഖപ്പെടുത്തിയിരിക്കണം. നാട്ടിൽ നിന്നുള്ള കഥാകാരന്മാരും കവികളും ഉൾപ്പെട്ട ജൂറിയായിരിക്കും അവാർഡുകൾ നിശ്ചയിക്കുക.

പങ്കെടുക്കുന്നവർക്കുള്ള നിർദ്ദേശങ്ങൾ:
1. രചയിതാവ്‌ ഇപ്പോൾ ഗൾഫ്‌ മേഖലയിൽ എവിടെയെങ്കിലും താമസിക്കുന്ന വ്യക്‌തി ആയിരിക്കണം
2. മൗലിക സൃഷ്ടികൾ മാത്രമേ പരിഗണിക്കുകയുള്ളൂ, വിവർത്തനങ്ങൾ, ആശയാനുകരണം എന്നിവ പരിഗണിക്കുന്നതല്ല.
3. ഒരു വ്യക്‌തി ഒരു വിഭാഗത്തിൽ ഒരു സൃഷ്ടി മാത്രമേ അയയ്ക്കാൻ പാടുള്ളൂ. എന്നാൽ ഒരാൾക്ക്‌ കഥയ്ക്കും കവിതയ്ക്കും ഒരേ സമയം പങ്കെടുക്കാം.
4. പ്രസിദ്ധീകരിച്ചതോ പ്രസിദ്ധീകരിക്കാത്തതോ ആയ സൃഷ്ടികൾ അയയ്ക്കാം.
5. കഥ 10 പുറത്തിലും കവിത 60 വരിയിലും കൂടാൻ പാടില്ല.
6. സൃഷ്ടികളിൽ രചയിതാവിന്റെ പേരോ തിരിച്ചറിയാനുതകുന്ന മറ്റ്‌ സൂചനകളോ പാടില്ല.
7. രചയിതാവിനെ സംബന്ധിച്ച വിവരങ്ങൾ, ബന്ധപ്പെടാനുള്ള നമ്പർ, ഇ മെയിൽ വിലാസം എന്നിവ പ്രത്യേകം തയ്യാറാക്കി സൃഷ്ടികൾക്കൊപ്പം അയയ്ക്കണം
8. സൃഷ്ടികൾ ലഭിക്കേണ്ട അവസാന തീയതി : 20.09.2010
9. ബഹറിൻ കേരളീയ സമാജം സാഹിത്യവിഭാഗം കമ്മിറ്റി അംഗങ്ങൾ മത്സരത്തിൽ പങ്കെടുക്കാൻ പാടില്ല
10. ജൂറിയുടെ തീരുമാനം അന്തിമമായിരിക്കും.
11. മത്സരത്തിനായി അയയ്ക്കുന്ന സൃഷ്ടികൾ തിരിച്ചു നല്‌കുന്നതല്ല, അതിനാൽ കോപ്പികൾ സൂക്‌ഷിക്കുക.
12. കൂടുതൽ വിവരങ്ങൾക്ക്‌ സാഹിത്യവിഭാഗം കണ്‍‌വീനര്‍ ബാജി ഓടംവേലി 00973 - 39258308 എന്ന നമ്പറിൽ ബന്ധപ്പെടുക. (bajikzy@yahoo.com)

എന്‍. കെ. വീരമണി (36421369) സെക്രട്ടറി
ബിജു എം. സതീഷ് (36045442) സാഹിത്യ വിഭാഗം സെക്രട്ടറി

പവിഴ മഴ പ്രകാശനം ചെയ്‌തു

2010-09-03T10:30:00.005+03:00

പവിഴ മഴ പ്രകാശനം ചെയ്‌തു
ഗള്‍ഫ് മേഖലയിലെ 80 കവികളുടെ കവിതകള്‍ അടങ്ങിയ കവിതാസമാഹാരം “ പവിഴ മഴ “ ബഹറിന്‍ കേരളീയ സമാജത്തില്‍ വെച്ച് പ്രകാശനം ചെയ്‌തു. പ്രശസ്‌ത ചലച്ചിത്രകാരന്‍ ശ്രി. പി. ടി. കുഞ്ഞുമുഹമ്മദായിരുന്നു പ്രകാശകന്‍. ആദ്യ പ്രതി അദ്ദേഹത്തില്‍ നിന്നും സമാജം സെക്രട്ടറി ശ്രി. എന്‍. കെ. വീരമണി ഏറ്റുവാങ്ങി. സമാജം ആക്‌ടിങ്ങ് പ്രസിഡന്റ് ശ്രീ. സജു കുമാര്‍ കെ. എസ്. അദ്ധ്യക്ഷത വഹിച്ചു. ബിജു എം. സതീഷ്, ബാജി ഓടംവേലി, കമാല്‍ മൊഹിതീന്‍, ഒഴൂര്‍ രാധാകൃഷ്ണന്‍, മുരളീധര്‍ തമ്പാന്‍, കാമിന്‍ നസീഫ് തുടങ്ങിയവര്‍ സംസാരിച്ചു.

ബാജി ഓടംവേലി എഡിറ്ററായുള്ള ഈ കവിതാ സമാഹാരത്തില്‍ ദുബായ്, അബുദാബി, ഖത്തര്‍, സൌദി, ബഹറിന്‍ തുടങ്ങി വിവിധ രാജ്യങ്ങളിലെ കവികളുടെ കവിതകള്‍ ഉള്‍പ്പെടുത്തിയിട്ടുണ്ട്. 73 കവിതകള്‍ ബഹറിനില്‍ നിന്നു തന്നെയുള്ളതാണ്. ബഹറിന്റെ വിവിധ ഭാഗങ്ങളിലുള്ള ലേബര്‍ ക്യാമ്പുകളും മറ്റും സന്ദര്‍ശിച്ച് കവിതയില്‍ താത്‌പര്യമുള്ള മുഴുവന്‍ പേരുടേയും രചനകള്‍ ഉള്‍പ്പെടുത്താന്‍ ശ്രമിച്ചിട്ടുണ്ട്. ഗള്‍ഫ് മേഖലയിലെ കവികളുടെ ഒരു ഡയറക്‌ടറിയായും ഈ കവിതാസമാഹാരം പ്രയോജനപ്പെടുത്താം. എഴുത്തുകാരുടെ ഫോട്ടോയും അവരേപ്പറ്റിയുള്ള വിവരണവും കൂടെ ചേര്‍ത്തിരിക്കുന്നത് എഴുത്തുകാരെ കൂടുതല്‍ അടുത്തറിയാന്‍ സഹായിക്കും. ബഹറിനിലെ എഴുത്തുകാരുടെ കൂട്ടായ്‌മയായ തണല്‍ പബ്ലിഷേര്‍സാണ് പുസ്‌തകം പ്രസിദ്ധീകരിച്ചിരിക്കുന്നത്. പതിനൊന്നംഗ കമ്മറ്റിയാണ്‍ കവിതകള്‍ ശേഖരിച്ച് പുസ്തകരൂപത്തിലാക്കാന്‍ നേതൃത്വം നല്‍കിയത്. ശ്രീ. സോണി ജോര്‍ജ്ജാണ് കവര്‍പേജ് തയ്യാറാക്കിയിരിക്കുന്നത്.

ആഗസ്‌റ്റ് രണ്ടാം തീയതി വൈകിട്ട് 8 മണിക്ക് നടക്കുന്ന സാഹിത്യവേദി മീറ്റിംഗില്‍ ഇതില്‍ എഴിതിയിരിക്കുന്ന കവിതകള്‍ കവികള്‍ അവതരിപ്പിക്കുകയും കവികളെ അനുമോദിക്കുകയും ചെയ്യും.

“ആധുനീക കേരള നിര്‍മ്മിതിയില്‍ പ്രവാസികളുടെ പങ്ക് “ എന്ന വിഷയത്തില്‍ നടക്കുന്ന സെമിനാറില്‍ ശ്രീ. പി. ടി. കുഞ്ഞുമുഹമ്മദ് വിഷയം അവതരിപ്പിച്ചു. തുടര്‍ന്ന് ചര്‍ച്ചയും അദ്ദേഹവുമായി മുഖാമുഖവും ഉണ്ടായിരുന്നു.

ദല-കൊച്ചുബാവ സാഹിത്യ പുരസ്‌കാരങ്ങള്‍ പ്രഖ്യാപിച്ചു

2010-04-25T08:38:00.001+03:00

ദുബായിലെ സാംസ്‌കാരിക സംഘടനയായ 'ദല'യുടെ കൊച്ചുബാവ സാഹിത്യ പുരസ്‌കാരങ്ങള്‍ പ്രഖ്യാപിച്ചു. കഥാ വിഭാഗത്തില്‍ ബാജി ഓടംവേലിയുടെ 'വെള്ളരി നാടകം', കവിതാ വിഭാഗത്തില്‍ രമ്യ തുറവൂരിന്റെ 'നോക്കുകുത്തി', ഏകാങ്ക നാടകത്തില്‍ ഗിരീഷ് ഗ്രാമികയുടെ 'ഒറ്റമുറി', ലേഖനത്തിന് അഭിജിത് മോസ്‌കോ എന്നിങ്ങനെയാണ് അവാര്‍ഡ് നേടിയത്. 5001 രൂപയും പ്രശസ്തി പത്രവും ഫലകവും അടങ്ങുന്നതാണ് പുരസ്‌കാരമെന്ന് സംഘാടക സമിതി ചെയര്‍മാന്‍ ഡോ.എ.കെ.നമ്പ്യാരും 'ദല' പ്രസിഡന്റ് എന്‍.കെ.കുഞ്ഞഹമ്മദും പത്രസമ്മേളനത്തില്‍ അറിയിച്ചു. മെയ് ആദ്യവാരം പുരസ്‌കാരങ്ങള്‍ നല്കും. പുരോഗമന കലാ സാഹിത്യ സംഘത്തിന്റെ നേതൃത്വത്തിലാണ് ചടങ്ങ്. പൊന്ന്യം ചന്ദ്രനും എം.കെ.മനോഹരനും സംബന്ധിച്ചു.

പുസ്‌തക പ്രകാശനം

2009-12-09T13:16:00.006+03:00

പുസ്‌തക പ്രകാശനം - ബാജിയുടെ കഥകള്‍ - ബെന്യാമിന്‍, ശിഹാബുദ്ദീന്‍ പൊയ്‌ത്തുംകടവ്,

എന്‍. കെ. മാത്യു, ബിജു കെ. നൈനാന്‍, വിനോദ് കാഞ്ഞങ്ങാട് തുടങ്ങിയവര്‍ സമീപംശിഹാബുദ്ദീന്‍ പൊയ്‌ത്തുംകടവ്

സുധീഷ് മാഷ്
രാജു ഇരിങ്ങല്‍
സദസ്സ് - മുന്‍‌നിര
അനില്‍ വേങ്കോട്, ബിജു അഞ്ചല്‍, ഫിറോസ് തിരുവത്ര, മണി ചാവക്കാട്, എം. കെ. നമ്പ്യാര്‍, ബാലചന്ദ്രന്‍ കൊന്നക്കാട്, ടി എസ്. നദീര്‍ തുടങ്ങിയവര്‍
സദസ്സ് - ഒരു വശം
സമ്പന്നമായ സദസ്സ്

പെറ്റു പെരുകുന്ന മയില്‍പ്പീലി

2009-11-13T07:54:00.002+03:00

മലയാളം മാഷ് വെടിയേറ്റു മരിച്ചു. ആറാം ക്ലാസ്സിലെ അബ്‌ദുവിനെ പോലീസ് അറസ്‌റ്റു ചെയ്‌തു. ആറാം ക്ലാസ്സില്‍ പഠിപ്പിച്ചു കൊണ്ടിരിക്കുമ്പോഴാണ് സംഭവം.പുറം തിരിഞ്ഞ് ബോര്‍ഡില്‍ എന്തോ എഴുതുകയായിരുന്നു മാഷ്. പെട്ടെന്ന് വലിയ ശബ്‌ദത്തില്‍ വെടി പൊട്ടുന്നത് എല്ലാവരും കേട്ടു.മാഷ് “അമ്മേ “ യെന്ന് വിളിച്ച് നിലത്തു വീണു.

കുട്ടികളില്‍ നിന്നെല്ലാം വലിയ വായില്‍ നിലവിളി ഉയര്‍ന്നു. പ്രധാന അദ്ധ്യാപകനും മറ്റ് അദ്ധ്യാപകരും ബഹളം കേട്ട് ഓടിയെത്തി. രക്തത്തില്‍ കുളിച്ച് പിടഞ്ഞു വീഴാന്‍ നിമിഷങ്ങളേ വേണ്ടി വന്നുള്ളു.

വെടി വെച്ചത് പുറത്തു നിന്നുള്ളവരാകാന്‍ വഴിയില്ല. ഗുരുവിന്റെ നേരെ വെടിയുതിര്‍ത്ത പാപി ആരാണ് ?

പോലിസ് എത്തി. എല്ലാ കുട്ടികളേയും ചോദ്യം ചെയ്‌തു. ആരാണിത് ചെയ്‌തതെന്ന് ആര്‍ക്കും അറിയില്ല. പോലീസ് ക്ലാസ്സ് മുഴുവന്‍ പരിശോദിച്ചു. അബ്‌ദുവിന്റെ പാഠപുസ്‌തകത്തില്‍ ഒളിപ്പിച്ചുവെച്ചിരുന്ന തൊണ്ടി കണ്ടെത്തി. ഒരു തോക്കിന്റെ ചിത്രം.

തന്നെ എന്തിനാണ് പോലീസ് ജീപ്പില്‍ കയറ്റിയിരിക്കുന്നതെന്ന് അബ്‌ദുവിനു മനസ്സിലായില്ല.അവന്റെ പേര് അബ്‌ദുവെന്നായത് ഒരിക്കലും അവന്റെ കുറ്റം കൊണ്ടല്ല. അവിടെ ഇരിക്കുമ്പോഴും അവന്‍ മയില്‍പ്പീലിയുടെ ലോകത്തായിരുന്നു.മയില്‍പ്പീലികള്‍ പുസ്‌തകത്താളുകളില്‍ വെച്ചാല്‍ പെറ്റുപെരുകുമെന്ന് പറയുന്നത് വെറുതെയല്ലാ. പത്രത്തില്‍ നിന്ന് വെട്ടിയെടുത്ത് പുസ്‌തക്ത്തിനുള്ളില്‍ സൂക്ഷിച്ചുവെച്ചിരുന്ന തോക്കിന്റെ ചിത്രം പെറ്റുപെരുകുകയായിരുന്നു.

വിഷമുള്ള പാമ്പ് - സൂക്ഷിക്കുക

2009-06-27T18:23:00.000+03:00

നാല്‍ക്കവലയിലെ നിറം മങ്ങിയ പ്രതിമയുടെ ചുവട്ടിലൂടെ ഒരു പാമ്പ് ഇഴഞ്ഞു നീങ്ങുന്നു.
ലാത്തിയുമായ് നിന്ന നിയമപാലകന്‍ ചുറ്റും നോക്കി
എറിയാനൊരു കല്ലൊ അടിക്കാനൊരു വടിയോ അടുത്തെങ്ങുമില്ല.
പരിപാവനമായ ലാത്തികൊണ്ട് പാമ്പിനെ തല്ലാമോ ?
ആലോചിച്ചു നിന്നപ്പോഴേക്കും പാമ്പ് പ്രതിമയുടെ ചുവട്ടിലുണ്ടായിരുന്ന പോട്ടിലൊളിച്ചു
നിയമപാലകനു കലി കയറി.
പാമ്പിന്‍ വിഷത്തിന്‍ നല്ല വിലയുണ്ട്.
പ്രതിമയുടെ കൈയില്‍ വടിയും ഉണ്ട്.
പാമ്പിനേയും വടിയേയും കൂട്ടിവായിച്ച നിയമപാലകന്‍
അര്‍ദ്ധ നഗ്നനെ കൈവിലങ്ങു വെച്ചു.

തണല്‍ മരം

2009-05-11T12:26:00.000+03:00

വഴിയരികില്‍ നിന്ന തണല്‍ മരം ലോറിയിടിച്ചാണ് കടപുഴകിയത്.

പിടിക്കപ്പെടുന്നവര്‍ മാത്രമേ കുറ്റവാളികളാവുകയുള്ളൂ അതിനാല്‍ ലോറിഡ്രൈവര്‍ മറ്റൊരു വഴിയിലൂടെ വണ്ടി ഓടിച്ച് രക്ഷപെട്ടു.

ലോറിഡ്രൈവറുടെ കുറ്റമാകാം, ഇന്നും രാവിലെ വീട്ടില്‍ നിന്നും ഇറങ്ങുമ്പോള്‍ കുടുംബസ്വത്തിന്റെ കാര്യത്തില്‍ എന്തോ കശപിശയുണ്ടായി. അതിന്റെ ടെന്‍ഷനിലായിരുന്നിരിക്കാം അയാള്‍. എങ്കിലും അയാള്‍ രക്ഷപെട്ടല്ലോ.

നാട്ടുകാര്‍ ഓടിക്കൂടി. കടപുഴകിക്കിടക്കുന്ന തണല്‍ മരത്തിനു ചുറ്റും നിന്നും. ആരാണീ ക്രൂരത ചെയ്‌തതെന്ന് ചോദിച്ച് പരസ്‌പരം നോക്കി. റോഡിനു കുറുകെ കടപുഴകി കിടക്കുന്ന തണല്‍ മരം ഗതാഗത തടസ്സം സൃഷ്‌ടിച്ചു. പോലീസില്‍ വിവരം അറിയിച്ചു. ഫയര്‍ ഫോഴ്‌സും എത്തിച്ചേര്‍ന്നു.

എത്ര വസന്തങ്ങള്‍ക്ക് സാക്ഷിയാണീ മരം. തിക്‌താനുഭവങ്ങളുടെ വെയിലേറ്റ് വാടാതെ, വന്‍ കാറ്റുകള്‍ വീശിയടിച്ചപ്പോള്‍ പിടിച്ചു നിന്ന് വേരുറച്ച മരം. ദേശാടന പക്ഷികള്‍ക്ക് വിശ്രമകേന്ദ്രമായി, ജന്മങ്ങള്‍ വിരിയുന്ന കൂടായി, വിശക്കുന്ന വയറുകള്‍ക്ക് ഫലമേകി, തണലായി.......

എത്ര തണലേകിയ മരമായാലും കടപുഴകിയാല്‍ മുറിച്ചു മാറ്റിയേ പറ്റു. വേദന അറിയാതിരിക്കാനായി അനസ്‌തേഷ്യ പോലും നല്‍കാന്‍ സമയമില്ല. ഗതാഗതക്കുരുക്ക് വര്‍ദ്ധിച്ചു കൊണ്ടേയിരിക്കുന്നു.

മരം മുറിച്ചു മാറ്റി. ഗതാഗതം എത്രയും വേഗം പുനഃസ്ഥാപിച്ചു.

പോസ്‌റ്റുമോര്‍ട്ടത്തിനു ശേഷം അടച്ചപെട്ടിയില്‍ തണല്‍മരം വീട്ടിലേക്ക് കൊണ്ടുവന്നു.

“അപ്പാ.. അപ്പാ.. ഇനി ഞങ്ങള്‍ക്ക് ആരുണ്ട്” എന്ന് വളരെ ഭാവാര്‍ദ്രമായി അലമുറയിട്ടുകൊണ്ട് അതേ ലോറിഡ്രൈവര്‍ അതിനു മുകളിലേക്ക് വീണു.

വിശ്വാസം

2009-05-03T06:35:00.002+03:00

ഒരു ദിവസം വൈകുന്നേരം ബിഷപ്പ്‌ഹൌസിലേക്കുള്ള റോഡിലൂടെ ദൈവവും പിശാചും കൂടി നടക്കുകയായിരുന്നു. അപ്രതീക്ഷിതമായി ചീറിപാഞ്ഞു വന്ന ഒരു കാര്‍ രണ്ടു പേരെയും ഇടിച്ചു തെറിപ്പിച്ചു. ദൈവം സംഭവസ്ഥലത്തു വെച്ചു തന്നെ മരിച്ചു. പിശാചിനെ പള്ളിവക സൂപ്പര്‍സ്‌പെഷ്യാലിറ്റി ആശുപത്രിയില്‍ കൊണ്ടു പോയി ജീവന്‍ രക്ഷിച്ചു.

ബിഷപ്പിനെതിരെ ചില അവിശ്വാസികള്‍ കുലപാതകകുറ്റം ആരോപിക്കാന്‍ ആലോചിച്ചെങ്കിലും ബിഷപ്പിന് ഒന്നിനേക്കുറിച്ചും ഭയമുണ്ടായിരുന്നില്ല. ബിഷപ്പുതന്നെ ദൈവത്തിന്റെ ഡെഡ് ബോഡി ഇടവക സെമിത്തേരിയോടു ചേര്‍ന്നുള്ള ‌‌‌‌ തെമ്മാടിക്കുഴിയില്‍ രഹസ്യമായി മറവു ചെയ്‌തു.

മരിച്ചത് ശരിയായ ദൈവമാണെങ്കില്‍ മൂന്നാം നാള്‍ പുഷ്‌പം പോലെ ഉയിര്‍ത്തെഴുന്നേല്‍ക്കുമെന്ന് ബിഷപ്പിനറിയാം. ഇല്ലെങ്കിലും കുഴപ്പമില്ല ജീവനോടിരിക്കുന്ന പിശാചിന്റെ പ്രലോഭനങ്ങളില്‍ വീഴാതിരിക്കാ‍നായി വിശ്വാസികള്‍ ദൈവത്തെ തേടി വന്നോളും.

ജീവനോടിരിക്കുന്ന പിശാചിനെക്കാണിച്ച് ദൈവവും ജീവിക്കുന്നെന്ന് പറഞ്ഞാല്‍ ആരാണീക്കാലത്ത് മറിച്ച് ചിന്തിക്കുക.

ഉപമ

2009-04-21T09:01:00.000+03:00

ശിഷ്യന്‍ : ഗുരോ... , തൊഴിലാളികളാണോ മുതലാളിമാരാണോ ആദ്യം ഉണ്ടായത് ?
ഗുരു : നല്ല ചോദ്യം, കോഴിയും മുട്ടയും പോലെ - മാങ്ങയും മാങ്ങാണ്ടിയും പോലെ ആദിയില്‍ അവര്‍ ഒന്നിച്ചായിരുന്നു.

ശിഷ്യന്‍ : ഗുരോ..., അവര്‍ പരസ്‌പര പൂരകങ്ങളല്ലേ, പിന്നെ എന്തേ എല്ലാ കഥയിലും മുതലാളിമാര്‍ക്ക് ക്രൂരതയുടെ മുഖം ?
ഗുരു : നിന്റെ ചോദ്യത്തില്‍ തന്നെ ഉത്തരം ഉണ്ട്. എങ്കിലും ഞാന്‍ വിശദീകരിക്കാം.

( ഗുരു മലമുകളിലെ പാറപ്പുറത്ത് കയറി കുന്തിച്ചിരുന്ന് മൊഴിഞ്ഞതെന്തെന്നാല്‍)

ഒരു അറബിനാട്ടില്‍ ഒരു മുതലാളിയും നാലു തൊഴിലാളികളും ജീവിച്ചിരുന്നു. മരുഭൂമിയുടെ നടുവിലുള്ള നീരൊഴുക്കുള്ള താഴ്‌വര മുതലാളിക്ക് സ്വന്തമായിരുന്നു. തൊഴിലാളികള്‍ രാവെളുക്കുവോളം വിശ്രമമില്ലാതെ അറബിയുടെ കൃഷിയിടം ഉഴുതു മറിച്ച്, വിത്തു പാകി, വെള്ളം നനച്ച്, കള പറിച്ച്, വളം ഇട്ട്, വിള വെടുക്കും. മുതലാളി അത് പട്ടണത്തില്‍ കൊണ്ടു പോയി വില്‍ക്കും. എന്നും വൈകിട്ട് മുതലാളി തന്നെയാണ് തൊഴിലാളികള്‍ക്ക് ഖുബ്ബൂസ് കൊടുക്കുന്നത്, അരുവിയില്‍ നിന്നും വെള്ളം ധാരാളമായി കുടിക്കാനും മുതലാളി അനുവദിച്ചിരുന്നു.

അങ്ങനെ മുതലാളിയും തൊഴിലാളിയും സന്തോഷത്തോടെ ജീവിക്കുമ്പോഴാണ് സാത്താന്‍ തൊഴിലാളികളുടെ മനസ്സില്‍ ഉത്തേജകമരുന്ന് കുത്തി വെച്ചത്‌ അവിടെ മുതലാണ് പ്രശ്‌നങ്ങള്‍ തുടങ്ങുന്നത്.

തൊഴിലാളികള്‍ തിരിച്ചറിഞ്ഞു തങ്ങള്‍ ചൂഷണം ചെയ്യപ്പെടുകയാണ്. എത്ര വര്‍ഷമായി ലീവിനു പോയിട്ട്, ശമ്പളം കിട്ടിയിട്ട് മാസങ്ങളാകുന്നു, ഒരു നേരത്തെ ഭക്ഷണം കഴിച്ച് തങ്ങള്‍ പട്ടിണിക്കോലങ്ങളായി മാറിയിരിക്കുന്നു. തങ്ങളുടെ അദ്ധ്വാനം വിറ്റ് മുതലാളി തടിച്ച് കൊഴുത്ത് ആനപോലെ വളരുന്നു. മുതലാളിയുടെ ആര്‍ഭാട ജീവിതത്തിന്‍ തങ്ങള്‍ വളമാകുകയായിരുന്നു. ഇനിയും ഈ അനീതി അനുവദിച്ചു കൂടാ.

തൊഴിലാളികള്‍ സംഘടിച്ചു, മരത്തണലില്‍ ഒന്നിച്ചു കൂടി ആലോചിച്ചു. മുതലാളിയെ അപായപ്പെടുത്തുവാനും സ്വാതന്ത്ര്യത്തിന്റെ ലോകത്തേക്ക് ഓടി രക്ഷപെടുവാനും കൂട്ടായ തീരുമാനം എടുത്തു. മുതലാളി വരുന്ന വഴിയില്‍ ഒരു കിടങ്ങുണ്ടാക്കി അതില്‍ ചാടിച്ച് കൊല്ലുവാന്‍ ഉറച്ചു.

പിറ്റേ ദിവസം തന്നെ മുതലാളി വരുന്ന വഴിയില്‍ നാലു പേരും ചേര്‍ന്ന് വൃത്താകൃതിയില്‍ കിടങ്ങ് കുഴിക്കാന്‍ തുടങ്ങി. മുതലാളിയോടുള്ള വാശി കിടങ്ങിന്റെ ആഴത്തില്‍ നിന്ന് അളക്കാം.

കിടങ്ങിന്റെ പണിതീരും മുമ്പേ മുതലാളി എത്തി. കിടങ്ങില്‍ പണിയെടുക്കുന്ന അസ്ഥികൂടങ്ങള്‍ക്ക് മുകളിലേക്കാണ്‍ ആന പോലെ വീണത്. നാല്‍ തൊഴിലാളികളും ഒടിഞ്ഞു വീണ് തല്‍ക്ഷണം ചത്തു. മുതലാളി അവിടെക്കിടന്ന് വിശപ്പിന്റെ വിലയറിഞ്ഞ് മണ്ണുവാരി തിന്ന് വയറു പൊട്ടി മരിച്ചു.

അങ്ങനെ മുതലാളി വീണാല്‍ മുതലാളിയും തൊഴിലാളിയും ഇല്ലാതാകുമെന്ന ചൊല്ല് അറബിനാട്ടില്‍ പാട്ടായി.

ശിഷ്യന്‍ : ഗുരോ.., ഞാന്‍ ആലോചിക്കുകയായിരുന്നു... ശിഷ്യനുണ്ടായതുകൊണ്ടല്ലേ ഗുരു ഗുരുവാകുന്നതെന്ന്. എന്നിട്ടും എന്തേ എനിക്കൊരു വിലയുമില്ലാത്തത് ?

(ഗുരുവിനെ നേരിട്ട് ബാധിക്കുന്ന ചോദ്യം കേട്ട് ഗുരുവിന്റെ മുഖം ദേഷ്യം കൊണ്ട് ചുവന്നു. ശിഷ്യന്‍ താഴ്‌വാരത്തിലേക്ക് ഓടി രക്ഷപെട്ടതു കൊണ്ട് സംവാദം അവിടെ അവസാനിച്ചു.)

മനുഷ്യ സത്യം

2008-12-25T12:30:00.001+03:00

ജന്നല്‍ ചാടുകയും ഭക്ഷണം കഴിയ്‌‌ക്കുകയും തന്റെ അവകാശമാണെന്ന് കണ്ടന്‍ പൂച്ച വിശ്വസിച്ചിരുന്നു. അതിക്രമിച്ചു കടക്കലും അപഹരിക്കലും എന്നും വെറുക്കപ്പെട്ടവരുടെ വാക്കുകളാണ്. താന്‍ ആര്‍‌ക്കൊക്കെയോ പ്രിയപ്പെട്ടവനാണ്.

അടച്ചുവെച്ചിരുന്ന പാല്‍പ്പായസം തട്ടി മറിച്ച് നക്കിക്കുടിക്കുമ്പോള്‍ അന്യന്റെ മുതല്‍ അപഹരിക്കുകയാണെന്ന വിചാരമൊന്നും അവനില്ലായിരുന്നു. ഇത്ര രുചിയുള്ള പാല്‍പ്പായസം ജീവിതത്തില്‍ കുടിച്ചിട്ടില്ല. ആര്‍‌ത്തിയോടെ മുഴുവന്‍ ആസ്വദിച്ച് കുടിച്ചു.

പാല്‍‌പ്പായസം കുടിച്ച് നിമിഷങ്ങള്‍ക്കുള്ളില്‍ കൈ കാലുകള്‍ കുഴഞ്ഞ് മുറിയുടെ മൂലയില്‍ വീണപ്പോള്‍ കണ്ടന്‍ പൂച്ച വിധിയില്‍ വിശ്വസിച്ചു. പല നാള്‍ കട്ടാല്‍ ഒരിക്കല്‍ പിടിക്കപ്പെടുമെന്ന് പഠിച്ചു.

പാല്‍‌പ്പായസത്തില്‍ വിഷം ചേര്‍ത്ത് തന്നെ കൊന്നവരെയൊന്നും കണ്ടന്‍ പൂച്ച ശപിച്ചില്ല. ഈ മരണം തന്റെ തെറ്റുകളുടെ ശിക്ഷയാണെന്ന് സ്വയം വിചാരിച്ചു.

കണ്ടന്‍ പൂച്ച ലോകത്തിന് വലിയൊരു സന്ദേശം നല്‍കിയാണ് പിടഞ്ഞു മരിച്ചത്.
“ അതിക്രമിച്ചു കടക്കരുത്.... അന്യന്റെ മുതല്‍ ആഗ്രഹിക്കരുത്....” ഇതായിരുന്നു അവന്റെ അന്ത്യമൊഴി.

ആ വീട്ടിലെ ഭാര്യ സ്‌നേഹം കുറുക്കി ഭര്‍‌ത്താവിനായ് എടുത്തു വെച്ച പാല്‍‌പ്പായസമാണ് താന്‍ എടുത്തു കുടിച്ചതെന്നും, മറ്റാരുടേയോ വിധി തന്റെ തലയില്‍ വന്നു വീഴുകയായിരുന്നെന്നുമുള്ള മനുഷ്യ സത്യത്തിന് പൂച്ചകളുടെ ലോകത്ത് ഒരു വിലയുമില്ല.

പുല്‍ക്കൂട്ടില്‍ ജനിച്ചു ( പടം)

2008-12-24T13:58:00.004+03:00

യേശുക്കുഞ്ഞ് പുല്‍‌ക്കൂട്ടിലാണ് ജനിച്ചതെന്ന് ആരോ പറഞ്ഞു കൊടുത്തു.
ക്രിസ്‌തുമസ് ട്രീ ഇട്ട ദിവസം മുതല്‍ ഈ പെട്ടിയിലാണ് ആശാന്റെ കിടപ്പ്.
അടിച്ച വഴിയെ പോയില്ലെങ്കില്‍ പോയ വഴിയെ അടിക്കാമെന്നു വെച്ചു.

ബൂലോകര്‍ക്ക്,

എന്റെയും ഡാന്‍‌മോന്റെയും ക്രിസ്‌തുമസ് ആശംസകള്‍

ബാജി ഓടംവേലി, ബഹറിന്‍

ആടുജീവിതം - ബെന്യാമിന്‍

2008-11-20T13:16:00.000+03:00

ആടുജീവിതം - ബെന്യാമിന്‍

2008-11-16T21:53:00.004+03:00

പ്രിയപ്പെട്ടവരെ,

ശ്രീ. ബെന്യാമിന്റെ “ആടു ജീവിതം“ എന്ന പുതിയ നോവല്‍ പ്രസിദ്ധീകരിച്ചിരിക്കുന്നു.

ബുലോകത്തിലെ മറ്റൊരു അംഗത്തിന്റെ

ഒരു സാഹിത്യ കൃതി കൂടി അച്ചടി മഷി പുരണ്ടിരിക്കുന്നു.

ഗ്രീന്‍ ബുക്സ് ആണ് പ്രസാധകര്‍.

ഗ്രന്ഥ കര്‍ത്താവില്‍ നിന്നും പുസ്തകത്തെ പറ്റി കേള്‍‍ക്കുന്നതിനും,

ബെന്യാമിനെ അനുമോദിക്കുന്നതിനുമായി

ബഹ്‌റൈന്‍ ബ്ലോഗ്ഗേഴ്സ് വീണ്ടും ഒത്തു കൂടുന്നു.

ഈ വരുന്ന വെള്ളിയാഴ്ച സന്ധ്യക്ക് 7.00 മണിക്ക്.

പ്രസ്തുത ചടങ്ങിലേക്ക് എല്ലാ മാന്യ ബ്ലോഗ്ഗര്‍മാരേയും

സവിനയം ക്ഷണിച്ചു കൊള്ളുന്നു...

വേഷമില്ലാതെ...(ജയറാം)

2008-11-06T23:12:00.004+03:00

ബഹറിനിലെ മനാമയിലൂടെ സന്ധ്യയ്‌ക്ക്‌ വണ്ടിയോടിക്കുമ്പോള്‍

വഴിയരികില്‍ കണ്ടത്....

ഇതാര് നമ്മുടെ ജയറാം അണല്ലോ ?

ക്യാമറയെടുത്ത് ക്ലിക്കുകയായി....

“ ഹലോ പാര്‍വതി, ഞാന്‍ വേഷമെടുക്കാന്‍ മറന്നു പോയി..

വേഷമില്ലാതെ ആളുകളെങ്ങനെ തിരിച്ചറിയും”

“സുഹൃത്തെ, എന്റെ മുഖത്തേക്കു നോക്കി സത്യം പറയൂ

എന്നെ കണ്ടാല്‍ ആരാണെന്നു തോന്നും.”

മരുഭൂമിയില്‍ നിന്നും മനാമയിലേക്ക് (പടം)

2008-10-22T20:05:00.010+03:00

മരുഭൂമിയില്‍ നിന്നും നാലുപേര്‍ മനാമ കാണാനായി പുറപ്പെട്ടു.

“നിനക്കറിയാമോ ലോകത്തിലെ ഏറ്റവും ചിലവുകൂടിയ

സിറ്റികളിലൊന്നാണ് മനാമയെന്ന് ”

“ നീ വെറുതേ പറഞ്ഞ് കൊതിപ്പിക്കാതെ ”

“എടാ കഴുതേ, വേഗം നടക്ക് മനാമ അടുക്കാറായി”

“ എന്നെ, കഴുതേന്നു വീളിക്കല്ലെന്ന് എത്രവട്ടം പറഞ്ഞിട്ടുണ്ട് ”

“ദാ നോക്ക് ഞാനല്ല കഴുത, അതാ ആ പോകുന്നതാ കഴുത”

“നടന്നു പോകുന്നതോ........, മുകളില്‍ ഇരിക്കുന്നതോ....... ? ”

............................................ :) :) :)

[സാമ്പത്തിക പ്രതിസന്ധി കാരണം ചെലവുകുറഞ്ഞ വാഹനം]

ചാഞ്ഞ്, കവിണ്, പാട്ടപ്പുറത്ത് (പടം)

2008-10-22T00:00:00.010+03:00

വേരുകള്‍ ഉറച്ചു പോയി.....

കരയോടു കടുത്ത പ്രേമം...

എന്നെ കണ്ടാല്‍ കുഴപ്പം വല്ലതും ഉണ്ടോ ?

ചെറിയ ചരിവുണ്ട് ... കാര്യമാക്കേണ്ട....

കവിണു വീണു...

ഇനിയും വേഗം എഴുന്നേല്‍ക്കും നടക്കും പിന്നെ ഓടും..

പാട്ടപ്പുറത്ത് രാജാവ്‌....

ഒരു നാള്‍ ഞാനും കടലില്‍ നീന്താന്‍ പോകും

അതാ അവിടെയാണ് നഗരം

അവിടെയാണ് വികസനം ഉയരുന്നത്.

ദുശ്ശകുനം

2008-09-29T07:44:00.001+03:00

രാവിലെ ജോലിയ്ക്കായ് പോകാന്‍ ഇറങ്ങുമ്പോള്‍ ദുശ്ശകുനങ്ങളൊന്നും കാണാന്‍ ഇടയാകരുതേയെന്ന് ഉണരുമ്പോള്‍ത്തന്നെ പ്രാര്‍‌ത്ഥിക്കാറുണ്ട്.

നാട്ടിലായിരുന്നെങ്കില്‍ ദുശ്ശകുനം കണ്ടാല്‍ അന്ന് ജോലിയ്‌ക്ക് പോകേണ്ടെന്ന് വെയ്‌ക്കാം, ഇവിടെ ഈ ഗള്‍ഫില്‍ അതു പറ്റില്ലല്ലോ? ഇവിടെ ആര്‍‌ക്കാ ശകുനത്തിലൊക്കെ വിശ്വസിക്കാന്‍ സമയം കിട്ടുക !

ആഴ്‌ചയില്‍ രണ്ടു മൂന്നു ദിവസങ്ങള്‍ ദുശ്ശകുനങ്ങള്‍ വന്ന് വഴി മുടക്കി ജോലിയ്‌ക്ക് പോകാതിരുന്നത് ഇന്ന് ഓര്‍‌മ്മമാത്രം.

ഇന്ന് പതിവ് പ്രാര്‍‌ത്ഥനയോടെ വഴിയിലോട്ട് ഇറങ്ങിയപ്പോള്‍ കണി കണ്ടത് ഒരു പട്ടി വാലും താത്തിട്ട് വിനീതനായി നില്‍ക്കുന്ന കാഴ്‌ചയാണ്. ഗള്‍ഫു നാട്ടിലെ പട്ടി അറബിയായാലും വിദേശിയായാലും പട്ടിയാണ്. അതും പെണ്‍പട്ടിയെ കണി കാണുന്നത് ദുശ്ശകുനമാണെന്ന് ഉറപ്പ്. ഇന്ന് തന്നെ തേടി ഏതോ അപകടം പതിയിരിക്കുന്നുണ്ടെന്ന് മനസ്സ് മന്ത്രിച്ചു.

ദുശ്ശകുനമാണെന്നും വിചാരിച്ച് ജോലിയ്‌ക്ക് പോകാതിരിക്കാന്‍ പറ്റില്ലല്ലോ ! എന്തു വന്നാലും അനുഭവിക്കുകയെന്നുറച്ച് ജോലിക്കു പോയി.

ഓഫീസിലെത്താന്‍ പതിവു പോലെ ഇന്നും അല്പം വൈകി. ക്യാബിനു മുന്‍പില്‍ മാനേജര്‍ എനിക്കുള്ള കത്തുമായി കാത്തു നില്‍ക്കുന്നുണ്ടായിരുന്നു.

കത്തു വായിച്ചു നോക്കേണ്ട കാര്യമില്ല. അതിന്റെ ഉള്ളടക്കം ഊഹിക്കാനാവും, തന്നെ പിരിച്ചു വിട്ടുകൊണ്ടുള്ള കത്താകും.

“അല്ലെങ്കിലും നിങ്ങളോടുകൂടെ ജോലിചെയ്യുന്ന എന്നെ വേണം പറയാന്‍“
കത്തും വാങ്ങി ഓഫീസിന്റെ പടികളിറങ്ങി.

വാലും താഴ്‌ത്തിയിട്ട് നില്‍‌ക്കുന്ന പെണ്‍പട്ടിയെ കണി കണ്ടപ്പോഴേ വിചാരിച്ചതാണ് എന്തോ അപകടം പതിയിരിക്കുന്നുണെന്ന്. എന്തായാലും ജീവഹാനിയൊന്നും സംഭവിച്ചില്ലല്ലോ !

താമസിക്കാതെ ശകുനത്തില്‍ വിശ്വാസമുള്ളവരുടെ നാട്ടിലേക്ക് തിരികെ പറക്കാമല്ലോ എന്ന് ഓര്‍‌ത്തപ്പോള്‍ മനസ്സിന്റെ ഏതോ കോണില്‍ സന്തോഷത്തിന് ചിറകു മുളച്ചിരുന്നു.

പിന്നാമ്പുറം
മാനേജര്‍ നല്‍‌കിയ കത്തില്‍ പ്രൊമോഷന്‍ ഓര്‍‌ഡറായിരുന്നു. ആ കത്തും വാങ്ങി ദേഷ്യപ്പെട്ട് പിറുപിറുത്തു കൊണ്ട്‌ പടികളിറങ്ങി പോകുന്നതു കണ്ട മാനേജര്‍ പിന്നീട് അവനെ ജോലിയില്‍ നിന്നും പിരിച്ചു വിടുകയായിരുന്നു.

പ്രവചനം

2008-09-27T19:26:00.000+03:00

വിശേഷമുണ്ടെന്ന് അറിഞ്ഞപ്പോള്‍ത്തന്നെ അവള്‍നിര്‍‌ബ്ബന്ധപൂര്‍‌വ്വം പറഞ്ഞു.
“ ആണായിരിക്കും അല്ല ആണാണ് “

കടിഞ്ഞൂല്‍പ്രസവത്തിന്റെ എല്ലാ ആധികളും മനസ്സിലേറ്റി നടക്കുമ്പോള്‍കൂട്ടുകാരുടെയൊക്കെ വാക്കുകള്‍വേദവാക്യമായിരുന്നു.
“ നിങ്ങള്‍ഭാഗ്യമുള്ളവരാ... കഴുത്തിനു ചുറ്റുമുള്ള കറുത്ത പാടുകണ്ടാലറിയാം ആണാണെന്ന്”

അവള്‍ഒരു കൈയില്‍കൊള്ളാവുന്നത്ര മഞ്ചാടിക്കുരു വാരി എണ്ണി നോക്കി. ആകെ മഞ്ചാടിക്കുരുവിന്റെ എണ്ണം ഒറ്റ അക്കമാണെങ്കില്‍ആണും ഇരട്ട അക്കമാണെങ്കില്‍പെണ്ണും. ആവര്‍‌ത്തിക്കപ്പെട്ട മഞ്ചാടികണക്ക് പറഞ്ഞു.
“ ആണാണ്”

പരമ്പരാഗത ചൈനീസ് കലണ്ടറില്‍പ്രായവും ഗര്‍‌ഭം ധരിച്ച മാസവും നോക്കുമ്പോളും സംഗതി ശരിയാണ്.
“ ആണാണ്”

പ്രസവമുറിയുടെ പുറത്തെ ആകാംഷയോടുള്ള കാത്തിരിപ്പിന്റെ അവസാനം നേഴ്സ് തുണിയില്‍പൊതിഞ്ഞ കുഞ്ഞിനെ അപ്പന്റെ കൈകളിലേക്ക് കൊടുക്കുമ്പോള്‍പറഞ്ഞു.
“പെണ്ണാണ്”

സ്‌നേഹത്തോടെ പെണ്‍കുഞ്ഞിനെ കൈയില്‍വാങ്ങുമ്പോള്‍അപ്പനോര്‍‌ത്തു എല്ലാവരുടേയും ‘ആണാണെ‘ന്നുള്ള പ്രവചനങ്ങള്‍തന്നെക്കുറിച്ച് ആയിരുന്നല്ലോയെന്ന്.

പൂക്കളമത്സരം (പടം)

2008-09-06T23:27:00.002+03:00

കടപ്പാട് : ബഹറിന്‍ കേരളീയ സമാജം

വടംവലി ( പടം )

2008-09-05T13:57:00.003+03:00

______ കുഞ്ഞും തന്നാലായത്

കാണ്മാനില്ല

2008-07-30T09:01:00.006+03:00

കിണറും കുളവും
വെറുതേ വറ്റിച്ചു
പത്രപ്പരസ്യങ്ങളൊക്കെ
പാ‍ഴ്‌ച്ചിലവായ്
എന്നെത്തേടിപ്പോയവരൊക്കെ
നിരാശരായ് തിരികെയെത്തി
കര്‍‌മ്മങ്ങള്‍ തുടങ്ങി

ഇനിയും ഞാന്‍ പോകാം
എനിക്കല്ലാതെ മറ്റാര്‍‌ക്കാണ്
എന്നെ കണ്ടെത്താനാവുക.

------------------------------------
ഈ കഥ വായിക്കണെ... വെള്ളരിനാടകം
------------------------------------

ഒരു സിനിമപോലെ

2008-07-06T18:08:00.001+03:00

അറുപതു കഴിഞ്ഞ അവിവാഹിതനായ സത്യശീലന്‍ ‘എന്റെ സത്യാന്വേഷണ പരീക്ഷണങ്ങള്‍‘ വായിച്ചു കൊണ്ട് ചാരുകസേരയില്‍ കിടക്കുകയായിരുന്നു.

വാതിലില്‍ ആരോ തുടര്‍‌ച്ചയായി മുട്ടിക്കൊണ്ടിരുന്നു.
വാതില്‍ തുറന്നപ്പോള്‍ അടുത്ത വീട്ടിലെ പെണ്‍‌കുട്ടി.
കോളേജില്‍ പഠിക്കുന്ന പതിനേഴു തികയാത്ത പെണ്‍‌കുട്ടി.
അവള്‍ പലപ്പോഴും വാതിലില്‍ മുട്ടി വായനയ്‌ക്ക് ഭംഗം വരുത്താറുണ്ടായിരുന്നു.

അവള്‍ വന്ന പാടെ സത്യശീലന്‍ വായിച്ചുകൊണ്ടിരുന്ന പുസ്‌തകം ബലമായി പിടിച്ചു വാങ്ങി മടക്കി വെച്ചു.

ഇന്നലെ കണ്ട സിനിമയില്‍ മാഷിന്റെ പ്രായമുള്ള നായകന്‍ അവളുടെ പ്രായമുള്ള നായികയെപ്പറ്റി കവിത എഴുതി പാടുന്നുണ്ടു പോലും.

അവളൊരു കസേര വലിച്ചിട്ട് അതില്‍ ഇരിപ്പുറപ്പിച്ചു.
അവളേപ്പറ്റി ഒരു കവിത എഴുതണം. അതാണ് പെണ്‍കുട്ടിയുടെ ആവശ്യം.

സിനിമയുടെ കഥ അവള്‍ മാഷിനു പറഞ്ഞു കൊടുത്തു.
സിനിമയില്‍ കണ്ട പ്രേമരംഗങ്ങള്‍‌ക്കൊത്ത് അവളുടെ മനസ്സ് നൃത്തം വെച്ചു.

സത്യശീലന്‍ ഒരു കവിതയെഴുതിക്കൊടുത്തു.
അവള്‍ പ്രസിദ്ധീകരിക്കുകയോ ചവറ്റുകൊട്ടയിലെറിയുകയോ എന്തു വേണമെങ്കിലും ചെയ്യട്ടെ.

പെണ്‍‌കുട്ടി പോകുമ്പോള്‍ മാഷിനെ കെട്ടിപ്പിടിച്ച് ചുംബിക്കാന്‍ മറന്നില്ല.

സത്യശീലന്‍ വീണ്ടും ‘എന്റെ സത്യാനേഷണ പരീക്ഷണങ്ങള്‍ വായിച്ചു കൊണ്ട് ചാരുകസേരയില്‍ കിടന്നു.

മോഷണം

2008-06-29T07:25:00.000+03:00

ജയിലിലും പുറത്തും കള്ളന്മാരുള്ള കാലം.
പിടിക്കപ്പെട്ട കൊച്ചു കള്ളന്മാര്‍ അകത്തും.
പിടിക്കപ്പെടാത്ത വലിയ കള്ളന്മാര്‍ പുറത്തും.

“വിലയുള്ളതൊക്കെ ലോക്കറിന്‍ സൂക്ഷിക്കണം.“
അവന്‍ അവളെ ഉപദേശിച്ചു.

അവള്‍ പണവും പണ്ടവും കൂടെ ഹൃദയവും ലോക്കറില്‍ വെച്ചു.
കാമുകന്‍ ലോക്കര്‍ തുറന്ന് പണവും പണ്ടവും മോഷ്‌ടിച്ച് നാടുവിട്ടു.

ഒരു പെരും കള്ളന്‍ മോഷ്‌ടിക്കാനായ് വന്നു
തുറന്ന ലോക്കറിനുള്ളീല്‍ ഒരു ഹൃദയമിരുന്ന് കരയുന്നത് കണ്ടു
“ഹൃദയമെങ്കില്‍ ഹൃദയം“
പെരുംകള്ളന്‍ അവളുടെ ഹൃദയം സ്വന്തമാക്കി.

തലയില്ലാത്ത ചിത്രം

2008-06-22T18:43:00.000+03:00

ടൌണ്‍ഹാളിലെ ചിത്രപ്രദര്‍ശനം കാണാന്‍ പോകവെ
ഓടയിലൂടെ പാലും തേനും ഒഴുകുന്നത് കണ്ടു
നേതാക്കള്‍ മുഖത്തു നോക്കുകയും
ചിരിക്കുകയും ചെയ്യുന്നു
ഒരു പൊതുതെരഞ്ഞെടുപ്പുകൂടി ആസന്നമായെന്നറിഞ്ഞു

ചിത്രകാരന്‍ ഹാളിന്റെ മൂലയ്‌ക്കിരുന്ന് ചിത്രം വരയ്‌ക്കുന്നു
കൈയും കാലും ശരീരവും വരച്ചു കഴിഞ്ഞു
തല വരച്ചിരുന്നില്ല
പൂര്‍‌ത്തിയാക്കാത്ത ചിത്രം ചുളു വിലയ്‌ക്ക് വാങ്ങി

തലയില്ലാത്ത ചിത്രവും വാങ്ങിപ്പോകുന്ന കഴുതയെ കണ്ട്
ചിലര്‍ മനസ്സിലെന്തോ പറഞ്ഞ് ചിരിച്ചു
അവര്‍ക്ക് അറിയില്ലല്ലോ
ഇത് ഇന്ത്യന്‍ പ്രധാനമന്ത്രിയുടെ ചിത്രമാണെന്ന്

റോഡ് മുറിച്ച് കടക്കുമ്പോള്‍...

2008-06-15T13:14:00.000+03:00

റോഡിന്റെ ഇരു വശത്തേക്കും നോക്കി വാഹനങ്ങള്‍ വരുന്നില്ലെന്ന് ഉറപ്പുവരുത്തിയ ശേഷമേ റോഡ് മുറിച്ചു കടക്കാന്‍ പാടുള്ളൂ എന്ന് ചെറിയ ക്ലാസ്സില്‍ പഠിക്കുന്നതാണ്.

ആ വൃദ്ധന്‍ അതൊന്നും ശ്രദ്ധിച്ചിരിക്കില്ല.

ആരൊക്കെയാ വണ്ടിക്കു മുന്‍‌പില്‍ വന്നു പെടുന്നതെന്ന് കാണാന്‍ വാഹനത്തിന്‍ കണ്ണില്ലല്ലോ !

അത് ഓടിക്കുന്ന ഡ്രൈവറുടെ കാഴ്‌ചയില്‍ നിശ്ചിതസമയത്തിനുള്ളില്‍ ഓടിയെത്തേണ്ട ലക്ഷം മാത്രമാണുള്ളത്.

വണ്ടിയിലെ യാത്രക്കാര്‍ ഉറക്കത്തിന്റെ ആലസ്യത്തിലാണ്. മിക്കവരും കണ്ണുകള്‍ പൂട്ടി ഉറക്കം നടിക്കുകയാണ്. വടിയും കുത്തിപ്പിടിച്ച് റോഡ് മുറിച്ചു കടക്കാന്‍ ശ്രമിച്ച വൃദ്ധനെ ഇടിച്ചു തെറിപ്പിച്ചതൊന്നും അവര്‍ അറിയുന്നില്ലെന്നു നടിച്ചു, കാരണം അവരാരും അല്ലല്ലോ ആ വൃദ്ധന്‍.

കണ്ടക്‌ടര്‍ തലപുറത്തേക്കൊന്നിട്ടു നോക്കി, ലക്ഷ്യത്തിലേക്ക് ഡബിള്‍‌ ബെല്ലു കൊടുത്തു. ബസ്സ് പൊടി പറത്തി യാത്ര തുടര്‍‌ന്നു.

തിരക്കുള്ള ജനം വണ്ടിയിടിച്ച് മരിച്ചു കിടക്കുന്ന വൃദ്ധനെ നോക്കി – കാണാതെ തിരക്കില്‍ ലയിച്ചു.

കാവല്‍ നിന്ന പോലീസുകാരന്‍ ഡ്യൂട്ടി കഴിയാറായിട്ടും അവകാശികളെത്താത്തതില്‍ പരിഭവിച്ച് ജഡം ഓടയിലെ ശക്‌തിയുള്ള ഒഴുക്കിലേക്ക് തള്ളി ഫയല്‍ ക്ലോസ്സു ചെയ്‌തു. ഓടവെള്ളം ചെന്ന് ചേരുന്നതും ഗംഗ പോലൊരു നദിയിലാണല്ലോ. കടലിലെത്തിലെങ്കിലും വിശ്രമിക്കട്ടെ ആര്‍‌ക്കും വേണ്ടാത്ത ജന്മം.

പത്രത്തിന്റെ ചരമപേജില്‍ സ്വന്തം മുഖം തിരയുന്നവര്‍ അന്യന്റെ മുഖമെങ്ങനെ കാണാന്‍ !

വിലയില്ലാത്ത വാര്‍‌ത്തകള്‍ വിലയുള്ള ചാനല്‍ കാണുമോ ?

ആ വൃദ്ധനായ കണ്ണുപൊട്ടന്‍ ഒരിക്കലെങ്കിലും വണ്ടിയെ തൊട്ടറിഞ്ഞല്ലോയെന്ന് നമുക്കാശ്വസിക്കാം.

ഇടവേളയില്‍ തുടങ്ങിയത്

2008-06-14T09:56:00.000+03:00

അവളുടെ അര്‍‌ദ്ധനഗ്‌ന മേനിയൊ മുഖ സൌന്ദര്യമോ ആയിരുന്നില്ല, ആ മുഖത്ത് വിരിഞ്ഞ ആരെയും മയക്കുന്ന ചിരിയായിരുന്നു അവനെയും ആകര്‍ഷിച്ചത്.

അവളില്ലാതൊരു ജീവിതം അസാധ്യമാണെന്ന് അറിയുകയായിരുന്നു.

ആ ചിരി ജീവിതസന്ധ്യകളില്‍ ആശ്വാസമാകുമെന്നു ചിന്തിച്ച്, ഒന്നിച്ച് ജീവിതം തുടങ്ങി.

കൈ പിടിച്ചു നടന്നത് സ്വര്‍‌ഗ്ഗത്തിലൂടെയാണെന്ന് നിനച്ചു.

ആര്‍‌ഭാടങ്ങള്‍ വിലകൊടുത്ത് വാങ്ങുമ്പോള്‍ പോക്കറ്റ് കാലിയാകുന്നത് അറിയുന്നുണ്ടായിരുന്നുവോ ?

കടം വാങ്ങി ചിലവാക്കുമ്പോഴും അവള്‍ കൈയില്‍ മുറികെ പിടിച്ചിട്ടുണ്ടായിരുന്നു.

കാലം ചവച്ചു തുപ്പിയ ചണ്ടി...
കടം കയറി മുടിഞ്ഞവന്‍....
അവളുടെ മുന്‍‌പില്‍ ഫാനില്‍ തൂങ്ങി ആടുമ്പോഴും....

അവള്‍ സ്‌ക്രീനില്‍ ചിരിച്ചുകൊണ്ട് പുതിയ ഇരകള്‍‌ക്ക് വേണ്ടി വല വീശുകയായിരുന്നു.

പ്രതിഷേധിക്കുന്നു.......

2008-06-09T22:47:00.003+03:00

കേരള്‍സിന്റെ തെറ്റായ നടപടികളില്‍ പ്രതിക്ഷേധിച്ച്
ബൂലോകം ആചരിക്കുന്ന കരിവാരത്തോട്
ഐക്യദാര്‍ഡ്യം പ്രഖ്യാപിക്കുന്നു.....
മോഷണത്തിനും ബൂലോകര്‍‌ക്കെതിരെയുള്ള
ഭീഷണിക്കും എതിരെ പ്രതിഷേധിക്കുന്നു.......

ഉലക്ക - ഉലക്കമാത്രം

2008-05-08T17:21:00.000+03:00

ഉലക്ക - ഉലക്കമാത്രം.

വിവാഹത്തിന്, സുഹൃത്തിന്റെ വകയായിരുന്നു ഈ പുതുമയുള്ള സമ്മാനം.

“ഉരല്‍ ഇല്ലാതെ ഉലക്കമാത്രമായിട്ടെന്തിനാ.....,“
“ഇന്നത്തെക്കാലത്ത് ആരാ ഉരലും ഉലക്കയും മറ്റും ഉപയോഗിക്കുന്നത്.“
“ഞങ്ങള്‍ക്ക് ഗ്രൈന്ററുണ്ടല്ലോ....“
“ഇടിക്കുകയും പൊടിക്കുകയുമൊക്കെ ഗ്രൈന്ററിലാകാമല്ലോ !“
“എന്നാലും ഇരിക്കട്ടെ...“

“ഒരുമയുണ്ടെങ്കില്‍ ഉലക്കയിലും കിടക്കാം...” എന്നും പറഞ്ഞ് തോളില്‍ തട്ടി വിവാഹമംഗളങ്ങള്‍ നേരുമ്പോള്‍ വധൂ വരന്മാര്‍ മുഖത്തോടു മുഖം നോക്കി ഊറിച്ചിരിച്ചു.

മാസങ്ങള്‍ കഴിഞ്ഞപ്പോള്‍ സമ്മാനമായ് കിട്ടിയ ഉലക്ക ഉപയോഗിക്കാതിരുന്ന് നിറം മങ്ങുകയും അങ്ങിങ്ങ് പൂപ്പല്‍ പിടിക്കുകയും ചെയ്‌തു.

വര്‍‌ഷങ്ങള്‍ പോകവേ ഒരുനാള്‍ തിരിച്ചറീഞ്ഞു, ഉലക്കയ്‌ക്ക് ചിതല്‍ പിടിച്ചിരിക്കുന്നു.

പിന്നെ അതിനെച്ചൊല്ലി വഴക്കായി. വഴക്ക് മൂത്ത് കയ്യാങ്കളിയായി.

ഒരാള്‍ തന്റെ വലിയ ശത്രുവിന്റെ തലയില്‍ ഉലക്കകൊണ്ട് ആഞ്ഞടിച്ചു.

ഒരാള്‍ വേദന കൊണ്ട് പുളയുമ്പോഴും ഇരുവര്‍ക്കും സംതൃപ്‌തി തോന്നി.

വൈകിയാണെങ്കിലും വിവാഹ സമ്മാനത്തിന് ഉപയോഗമുണ്ടായല്ലോ !

പാസ്സിങ്ങ് ദി പാഴ്‌സല്‍

2008-04-23T13:21:00.000+03:00

കോളേജില്‍ പഠിക്കുന്ന കാലത്താണ് ആദ്യമായ് ‘പാസ്സിങ്ങ് ദി പാഴ്‌സല്‍‘ കളിക്കുന്നത്.

നല്ല രസമുള്ള കളിയാണ്.

മനോഹരമായി പൊതിഞ്ഞു കെട്ടിയ ഒരു സമ്മാനം കളിയില്‍ പങ്കെടുക്കുന്നവര്‍കൈമാറിക്കൊണ്ടിരിക്കും. സമ്മാനപ്പൊതി ഒരു കൈയില്‍നിന്ന് മറ്റൊരു കൈയിലേക്ക് കൈമാറുന്നതിനിടയില്‍ മറഞ്ഞു നിന്നൊരാള്‍ മണിയടിക്കും. അണിയടി ശബ്‌ദം കേള്‍ക്കുമ്പോള്‍ സമ്മാനപ്പൊതി ആരുടെ കൈയിലാണോ ഇരിക്കുന്നത് അവര്‍ പുറത്താകും. അവസാനം വരെ പുറത്താകാതെ നില്‍‌ക്കുന്ന ആളിന് സമ്മാനപൊതി കിട്ടും.

കളിക്കളത്തില്‍ഞങ്ങള്‍ പത്തു പന്ത്രണ്ടു പേരുണ്ടായിരുന്നു.

ഞാന്‍ ആദ്യമേ പുറത്തായി. സമ്മാനപ്പൊതി എന്റെ കൈയിലിരിക്കുമ്പോള്‍നിര്‍ഭാഗ്യവശാല്‍ മണിയടി ശബ്‌ദം മുഴങ്ങി. ഞാന്‍ നാണത്തോടെ പിന്‍‌വാങ്ങി.

മണിയടിശബ്‌ദം കേട്ടപ്പോള്‍ ആരുടെയൊക്ക കൈയിലാണോ സമ്മാനപ്പൊതിയിരുന്നത് അവരൊക്കെ പുറത്തായി.

അവസാനം അവശേഷിച്ചത് ഔസേപ്പാണ്.

അങ്ങനെയാണ് ഞങ്ങളുടെ കൂടെ പഠിച്ച മോളിക്കുട്ടി എന്ന സുന്ദരി (സമ്മാനപ്പൊതി) ഔസേപ്പിന്റെ സ്വന്തമായത്.

സ്‌ക്കൂള്‍

2008-03-28T22:14:00.000+03:00

പുറം പോക്കിലെ
ഉച്ചകഞ്ഞിയുള്ള സ്‌ക്കൂള്‍
പൊളിക്കുമെന്നറിഞ്ഞ്
അവിടെയുണ്ടായിരുന്ന
വവ്വാലുകള്‍
ടൈയില്‍
കെട്ടി ഞാന്നു ചത്തു

കള്ള നോട്ട്

2008-03-28T06:49:00.002+03:00

കുറേ വര്‍ഷങ്ങള്‍ക്കു മുന്‍‌പ് നൂറു രൂപയുടെ കള്ളനോട്ടുകൊണ്ട് കോഴഞ്ചേരിക്കു പോയി .
മൂപ്പതു രൂപായിക്ക് സാധനങ്ങള്‍ വാങ്ങി.
കൊടുത്തത് കള്ളനോട്ടാണെന്ന് അറിയാതെ കടക്കാരന്‍ രുപാ വാങ്ങി പെട്ടിയില്‍ ഇട്ടു.
ബാക്കി എഴുപതു രൂപാ വാങ്ങി വീട്ടിലേക്കു പോന്നു.
വീട്ടില്‍ വന്നു നോക്കിയപ്പോളാണ് സത്യം മനസ്സിലായത്.
കൈയ്യില്‍ നാല്‍പ്പതിന്റെയും മുപ്പതിന്റെയും ഓരോ നോട്ടുകള്‍.

തിരിച്ചു കിട്ടിയ സ്വാതന്ത്യ്രം

2008-03-26T09:01:00.000+03:00

തോമാച്ചന്റെ അപ്പന്റെ കാലം മുതല്‍ വീട്ടില്‍ റബ്ബറിന്റെ പണികള്‍‌ക്ക് കൂടെയുള്ള ആളാണ് ഷാജി. തോമാച്ചന്റെ വീടിന്റെ അടുത്തുതന്നെയുള്ള റബ്ബര്‍ ഉണങ്ങുന്ന പുകപ്പുരയോടു ചേര്‍‌ന്ന ഒറ്റമുറിയിലാണ് അവന്‍ താമസിച്ചിരുന്നത്.

റബ്ബര്‍ പണിയില്‍ പാലെടുത്തും മറ്റും സഹായിക്കാന്‍ വന്ന തെക്കേലെ പെണ്ണിനെ കല്ല്യാണം കഴിക്കേണ്ടിവന്നപ്പോള്‍ പുകപ്പുരമുറിയോടു ചേര്‍‌ന്ന് ഒരു ചായിപ്പുകൂടി കെട്ടിയത് ധാരാളമായിരുന്നു. രണ്ടു പിള്ളേരു കൂടി പിറന്നപ്പോഴും ഉള്ള സാഹചര്യത്തില്‍ അവര്‍ സന്തുഷ്‌ടരായിരുന്നു.

ഷാജി വെള്ളമടിക്കുന്നതും ഭാര്യയെ തല്ലുന്നതും രാത്രി വൈകുവോളം ബഹളം വെയ്‌ക്കുന്നതും ഒരു നിത്യ സംഭവമായിരുന്നു.

തോമാച്ചന്റെ വീട്ടില്‍ കാര്യങ്ങള്‍ അല്പം മയത്തിലായിരുന്നെങ്കിലും സ്ഥിതി വ്യത്യസ്ഥമല്ലായിരുന്നു.

തോമാച്ചന്‍ ധ്യാനം കൂടുകയും മാനസാന്തരപ്പെടുകയും ചെയ്‌തതു മുതലാണ് പ്രശ്‌നങ്ങള്‍ തുടങ്ങിയത്. ഷാജിയുടെ വെള്ളമടിയും രാത്രി വൈകിയും ഉച്ചത്തിലുള്ള ബഹളവും തോമാച്ചനെ അലോസരപ്പെടുത്തി.

തോമാച്ചന്‍ ഷാജിയെ ഉപദേശിച്ച് ദൈവ ഭാഗത്താക്കാന്‍ നോക്കിയെങ്കിലും വിജയിച്ചില്ല.

പിന്നെ തോമാച്ചന്‍ അറ്റകൈ പ്രയോഗിച്ചു. ജോലിയില്‍ നിന്നും പിരിച്ചു വിടുമെന്നും പുകപ്പുരയോടു ചേര്‍‌ന്നുള്ള മുറിയില്‍ നിന്ന് പുറത്താക്കുമെന്നും പറഞ്ഞ് ഭീഷണിപ്പെടുത്തിയപ്പോള്‍ സംഗതി ഏറ്റു.

ഷാജിയും വെള്ളമടി നിര്‍‌ത്തി. രാത്രിയാകുന്നതിനു മുന്‍‌പേ വീട്ടില്‍ വരികയും വഴക്കൊന്നുമില്ലാതെ സമയത്തു തന്നെ കിടന്നുറങ്ങാനും തുടങ്ങി.

ഒരു ആത്‌മാവിനെ രക്ഷപെടുത്തിയതില്‍ തോമാച്ചനും ആശ്വാസമായി.

ദിവസങ്ങള്‍ക്കു ശേഷം തോമാച്ചന്റെ പുരപ്പുറത്ത് വെള്ളം തോരാന്‍ ഇട്ടിരുന്ന പത്തെണ്‍‌പത് റബ്ബര്‍ഷീറ്റുകള്‍ കള്ളന്‍ കൊണ്ടു പോയി. ഓര്‍‌മ്മ വെച്ചകാലം മുതല്‍ റബ്ബര്‍‌ഷീറ്റ് പുരപ്പുറത്താണ് വെള്ളം തോരാന്‍ ഇടാറുള്ളത്. ആദ്യമായാണ് റബ്ബര്‍ ഷീറ്റുകള്‍ മോഷ്‌ടിക്കപ്പെടുന്നത്.

ഷാജി സ്വന്തം കാശുകൊണ്ട് വെള്ളമടിക്കുമ്പോഴും തനിക്കുണ്ടാകുന്ന ലാഭത്തെപ്പറ്റി തോമാച്ചന്‍ ബോധവാനായി.

“ കാശൊന്നും കൂട്ടി വെച്ചിട്ട് കാര്യമില്ലെടാ... അന്തിക്കൊരല്പം പൂസായില്ലെങ്കില്‍ പിന്നെ ജീവിതമെന്തിനാടാ.....” എന്നു പറഞ്ഞു കൊണ്ട് പിറ്റേ ദിവസം വൈകിട്ട് ഷാജിക്കൊരു മദ്യക്കുപ്പി സമ്മാനിച്ചു.

തിരിച്ചു കിട്ടിയ സ്വാതന്ത്യ്രം ഷാജിയുടെ മുഖത്തു കണ്ട് തോമാച്ചന്‍ മനസ്സില്‍ ചിരിച്ചു.

മറ്റൊരു ചാനല്‍

2008-03-09T00:54:00.000+03:00

വിവാഹത്തിന്റെ തലേന്നാള്‍ രാത്രിയില്‍ മധുരസ്വപ്‌നം കണ്ട് ഉറങ്ങേണ്ട കല്ല്യാണപ്പെണ്ണ് എല്ലാവരും ഉറങ്ങാനായി ഉറക്കം നടിച്ച് കാത്തിരിക്കുകയാണ്.

അത്യാവശ്യ സാധനങ്ങളോക്കെ ഒരു ബാഗിലാക്കി തന്റെ വളര്‍‌ച്ചക്ക് സാക്ഷിയായ വീടിനോട് യാത്രപറയാന്‍ ഒരുങ്ങിയിരിക്കുന്നു.

തന്റെ കാമുകന്‍ ഗെയിറ്റിനു പുറത്ത് ആരും കാണാതെ കാത്തു നില്‍ക്കുന്നതും, അവളുടെ അപ്പന്‍ ഉറക്കം വരാതെ മുറ്റത്തുകൂടി ഉലാത്തുന്നതും സ്‌ക്രീനില്‍ മാറി മാറി തെളിയുന്നുണ്ട്.

ഒരു ഇടവേളയ്‌ക്കു ശേഷം പരിപാടി തുടരും.....

ഹോ... ദൈവമേ... ഈ പരസ്യങ്ങള്‍ക്കൊണ്ട് തോറ്റല്ലോ !

ഇപ്പോള്‍ പരിപാടിയേക്കാള്‍ കൂടുതല്‍ പരസ്യങ്ങളാണ്. ആവര്‍ത്തിച്ച് ആവര്‍ത്തിച്ച് കാണിച്ച് മനസ്സില്‍ പരസ്യങ്ങള്‍ കുത്തി നിറയ്‌ക്കുകയാണ്. പരസ്യങ്ങളുടെയൊക്കെ പണം ഞങ്ങളില്‍ നിന്നുതന്നെയാണ് ഈടാക്കുന്നതെന്ന് അറിയുന്നതുകൊണ്ടാ സഹിക്കുന്നത്.

എന്നാലും സഹിക്കുന്നതിനൊരു പരിധിയില്ലേ.....

ആകാംഷയുടെ മുള്‍‌മുനയില്‍ നിര്‍‌ത്തിയെ പരസ്യങ്ങള്‍ കാണിക്കുകയുള്ളുവെന്ന് നിര്‍‌ബ്ബന്ധം പിടിച്ചാല്‍..., ഞങ്ങള്‍ക്ക് ചാനല്‍ മാറ്റാനറിയാമെന്ന് മറക്കേണ്ട....നല്ല പരിപാടികളുള്ള മറ്റ് ചാനലുകളും ഉണ്ട്.

സ്വപ്‌നത്തിന്റെ ചാനല്‍ മാറ്റാന്‍ എഴുന്നേറ്റപ്പോള്‍ അറിയാതെ ഉണര്‍‌ന്നുപോയി.

മാജിക്ക് പഠിക്കണം

2008-03-06T15:59:00.002+03:00

എനിക്ക് അന്നും ഇന്നും മാജിക്കില്‍ വിശ്വാസമില്ല.

ഒഴിഞ്ഞ കുഴലില്‍ നിന്നും പലവര്‍‌ണ്ണത്തിലുള്ള പൂക്കളെടുക്കുക.
പേപ്പര്‍ കത്തിച്ച് നൂറുരൂപാ നോട്ടാക്കുക.
ഒരു ഗ്ലാസ്സിലെ പാല്‍ പല ഗ്ലാസ്സില്‍ തുളുമ്പെ പകരുക.
സ്‌ട്രോയില്ലാതെ പാല്‍ ദൂരെ നിന്ന് വലിച്ച് കുടിക്കുക.
തൊപ്പിക്കുള്ളില്‍ നിന്നും ജീവനുള്ള മുയലിനെ എടുക്കുക.
ഇതൊക്കെ വെറും കണ്‍കെട്ടുകളാണ്.
കൈ വഴക്കമാണ്.
ടെക്‌നിക്കുകളാണ്.

ഞാനും ഷാലുവും കൂടി കപ്പലണ്ടിയും കൊറിച്ച് കൊച്ചു കൊച്ചു കളി തമാശകള്‍ പറഞ്ഞ് നദിക്കരയിലൂടെ മുട്ടാതെ മുട്ടി നടക്കുമ്പോള്‍ മറുകരയില്‍ മാജിക്ക് നടക്കുകയായിരുന്നു.

ഞങ്ങള്‍ സ്‌ക്കുളിലും കോളേജിലും ഒന്നിച്ചു പഠിച്ചവരാണ്.
ഒരേ നാട്ടുകാര്‍.
ഒരേ ജാതിക്കാര്‍.
സാമ്പത്തിക നിലവാരവും ഒത്തുപോകും.
ചേര്‍ച്ചകള്‍ നൂറില്‍ നൂറാണ്.
എനിക്കൊരു ജോലി കിട്ടിയാല്‍ വിവാഹം നടത്തിത്തരാന്‍ വീട്ടുകാരും മനസ്സില്‍ കുറിച്ചിരിക്കുകയാണ്.

നദിയുടെ മറുകരയില്‍ നിന്ന് മജീഷ്യന്‍ ഷാലുവിനെ വിളിച്ചു.
“കുട്ടീ കടന്നു വരൂ... അടുത്തയിനം ഒരു പെണ്‍കുട്ടിയെ ജീവനോടെ മൂന്നായി മുറിക്കുന്നതാണ്”

“ഷാലു പേടിക്കേണ്ട ഇതു വെറും ടെക്‌നിക്കാണ്...” ഞാന്‍ ധൈര്യം പകര്‍‌ന്നു.

“ വെള്ളത്തിനു മുകളിലൂടെ നടന്നു വരൂ” മജീഷ്യന്‍ ക്ഷണിച്ചു.

ഞങ്ങള്‍ക്ക് അദ്‌ഭുതമായി എങ്ങനെയാണ് വെള്ളത്തിനു മുകളിലൂടെ നടക്കുക.

മാജീഷ്യന്‍ വെള്ളത്തിനു മുകളിലൂടെ നടന്നു കാണിച്ചു.
മാജിഷ്യന്‍ വെള്ളത്തിലൂടെ നടന്ന് ഞങ്ങളുടെ അടുത്തു വന്നു.
ഷാലുവിന് മാജിക്കില്‍ വിശ്വാസമായി.
മജീഷ്യന്‍ ഷാലുവിന്റെ കൈ പിടിച്ച് വെള്ളത്തിനു മുകളിലൂടെ മറുകരയിലേക്ക് നടന്നു.

ഞാന്‍ വെള്ളത്തില്‍ നടക്കാന്‍ ശ്രമിച്ചു. പക്ഷേ ആവുന്നില്ല. ഞാന്‍ വെള്ളത്തില്‍ താഴ്ന്നു പോകുകയാണ്.

മറുകരയില്‍ കരഘോഷം മുറുകുന്നു. മജീഷ്യന്‍ എന്റെ ഷാലുവിനെ ഇപ്പോള്‍ മൂന്നോ നാലോ ആയി മുറിച്ചു കാണും.

ദിവസങ്ങളോളം ഞാന്‍ ആ നദിക്കരയില്‍ത്തന്നെ കാത്തു നിന്നു ഷാലു വരാഞ്ഞപ്പോള്‍ മനസ്സിലായി മാജിക്കില്‍ എന്തോ സത്യമുണ്ട്.

എനിക്കും ജീവിക്കാനായി മാജിക്കു പഠിക്കണം.

ശ്വാസ നിയന്ത്രണം

2008-01-17T23:43:00.000+03:00

പാഠം ഒന്ന്
സമാധിയിലേക്കുള്ള മാര്‍ഗ്ഗമാണ് ധ്യാനം.

പാഠം രണ്ട്
ധ്യാനത്തിന്റെ ഭാഗമാണ് യോഗ.

ഹാളില്‍ കയറി
തറയില്‍ ഇരുന്നു
അവര്‍ പറഞ്ഞ പ്രകാരം
ശ്വാസം ഉള്ളിലേക്ക് വലിച്ചു
പിടിച്ചു നിര്‍‌ത്തി
സാവകാശം പുറത്തേക്കു വിട്ടു
അഞ്ചു പ്രാവശ്യം ആവര്‍‌ത്തിച്ചു
ടെന്‍‌ഷന്‍ മാറി
പുറത്തിറങ്ങി
ഫീസ് അടയ്‌ക്കണം
കൌണ്ടറില്‍ ചെന്നു
ഓക്‌സിജന്‍ ബില്ല് കണ്ടു
ശ്വാസം നിലച്ചു
സമാധിയായി.

എയ് ആശാരി ചെക്കാ.......

2007-12-24T06:51:00.000+03:00

രണ്ടായിരം വര്‍‌ഷങ്ങള്‍‌ക്കു ശേഷവും ഞങ്ങള്‍‌ ക്രിസ്‌തുമസ് ആഘോഷിക്കുകയാണ്.

നീ അന്നു ഞങ്ങള്‍‌ വില്‍‌പ്പനക്കാരെ പള്ളിയില്‍‌ നിന്നും ചാട്ടവാറുകൊണ്ട് അടിച്ച് പുറത്താക്കിയപ്പോയെ ഞങ്ങള്‍‌ മനസ്സില്‍‌ തീരുമാനിച്ചുറപ്പിച്ച മധുരമായ പ്രതികാരം. ഇന്ന് പള്ളികളില്‍‌ മാത്രമല്ല ലോകം മുഴുവന്‍‌ നിന്നെ ഞങ്ങള്‍‌ വില്‍‌ക്കുകയാണ്. ചൈനക്കാര്‍‌ക്കും പോലും നിന്നെ ഇന്ന് അറിയാം അവരാണ് വളരെ വിലക്കുറവില്‍‌ നിന്നെ വില്‍‌ക്കുന്നത്. നീയും നിന്റെ കൂട്ടുകാരായ മീന്‍‌ പിടുത്തക്കാരും ചേര്‍‌ന്ന് എന്തൊക്കെയാ ഇവിടെ ചെയ്‌തതെന്ന് ഓര്‍‌മ്മയുണ്ടോ ? മൂന്നര വര്‍‌ഷം കൊണ്ട് കുരിശില്‍‌ കയറേണ്ട വല്ലകാര്യവും ഉണ്ടായിരുന്നോ ?രണ്ടായിരം വര്‍‌ഷങ്ങള്‍‌ക്കു ശേഷവും നിന്നെ ഞങ്ങള്‍‌ വില്‍‌ക്കുന്നു.
ക്രിസ്‌തുമസെന്നാല്‍‌ സാന്താക്ലോസ്സിന്റെ ജന്മദിനമാണെന്നാണ് കുട്ടികളെ പഠിപ്പിക്കാറുള്ളത്.
ക്രിസ്‌തുമസ്സെന്നാല്‍‌ രാവെളുക്കോളമുള്ള പാടി പിരിവാണ്.
ക്രിസ്‌തുമസ്സെന്നാല്‍ ഗായക സംഘ മത്‌സരമാണ്.
ക്രിസ്‌തുമസ്സെന്നാല്‍ ക്രിസ്‌തുമസ് ട്രീയാണ്.
ക്രിസ്‌തുമസ്സെന്നാല്‍‌ പല നിറത്തിലുള്ള വലുപ്പത്തിലുള്ള നക്ഷത്രമാണ്.
ക്രിസ്‌തുമസ്സെന്നാല്‍ പല രുചിയിലുള്ള പല ആകൃതിയിലുള്ള കെയിക്കാണ്.
ക്രിസ്‌തുമസ്സെന്നാല്‍ തലെന്നാള്‍‌ വാങ്ങിവെച്ച മദ്യകുപ്പികളാണ്.
ക്രിസ്‌തുമസ്സെന്നാല്‍ പടക്കമാണ്.
ക്രിസ്‌തുമസ്സെന്നാല്‍ പുതിയ വസ്‌ത്രങ്ങളാണ്.
ക്രിസ്‌തുമസ്സെന്നാല്‍ പരീക്ഷയ്‌ക്കു ശേഷമുള്ള അവധി ദിനങ്ങളാണ്.
ക്രിസ്‌തുമസ്സെന്നാല്‍ ചാനലുകളില്‍‌ പുതിയ സിനിമയാണ്.
ക്രിസ്‌തുമസ്സെന്നാല്‍........
ക്രിസ്‌തുമസ്സെന്നാല്‍........
ക്രിസ്‌തുമസ്സെന്നാല്‍........

ലോകസമാധാനത്തിനു വേണ്ടി ഇനിയും നീ പിറക്കുകയാണെങ്കില്‍‌ ......
നല്ല കുലത്തില്‍‌ പിറക്കണം. ( ആശാരി ചെക്കനായി പിറക്കരുത്.)

ലോകത്തിന്റെ ഏതുമൂലയിലും നിന്റെ പേരില്‍‌ വസ്‌തുവും ബഹുനില ബില്‍‌ഡിഗുംകളും ഉണ്ട്. (പശുവിന്റെ എരുത്തിലില്‍‌ പിറക്കരുത്.)

നിനക്കു പഠിക്കുവാനായി സഭ നടത്തുന്ന സ്‌ക്കൂളും കോളേജും ഉണ്ട്. ( സഭ പറയുന്നത് മാത്രം പഠിക്കുക പഠിപ്പിക്കുക)

അധികാരികളോട് മത്‌സരിക്കരുത് ( മൂന്നരവര്‍‌ഷവും കുരിശും മൂന്നരദിവസവും കുരിശുമാക്കും)

പിന്നെ പ്രധാനകാര്യം ഞങ്ങള്‍‌ വില്പനക്കാരോട് സഹകരിക്കുക നമുക്ക് എല്ലാം നല്ല ലാഭത്തില്‍‌ വില്‍‌ക്കാം...

ഹാപ്പി ക്രിസ്‌തുമസ്...............

ബാജി ഓടംവേലി & ഡാന്‍ മോന്‍

ഓര്‍‌മ്മകള്‍‌ വേട്ടയാടുന്നു

2007-12-18T08:48:00.001+03:00

വലിയ വീട്ടിലെ പുതുമുതലാളി
ഉമ്മറത്തെ ചാരുകസേരയില്‍
കാലും നീട്ടിയിരിക്കുമ്പോള്‍
ഓര്‍‌മ്മയില്‍ തീ കോരിയിട്ട്
ഗെയിറ്റിംങ്കല്‍ ആ പിച്ചച്ചെക്കന്‍ വീണ്ടും വന്നു
ഒട്ടിയവയറും
കീറിയ വള്ളിനിക്കറും
അതേ മുഖവും
ചെക്കന്റെ മുഖത്തു നോക്കാതെ
ഒരു നാണയത്തുട്ടെറിഞ്ഞു കൊടുത്തു
അവന്‍ പോയില്ല.
വാച്ചുമാനെ വിട്ടോടിച്ചു
പട്ടിയെ തുറന്നുവിട്ടു
എന്നിട്ടും ആ പിച്ചച്ചെക്കന്‍ പോയില്ല.
കണ്ണാടിയില്‍ നോക്കുമ്പോളൊക്കെ കാണാം
ഒരല്പം പ്രായം കൂടിയിട്ടുണ്ട്‌
കുടവയറും കഷണ്ടിയും ഉണ്ട്
എങ്കിലും അതേ മുഖം
ഭിത്തിയില്‍ നിന്നും നിറതോക്കെടുത്ത് വെടിയുതിര്‍‌ത്തു
പിച്ചച്ചെക്കന്‍ മരിച്ചു വീണു.

നക്ഷത്ര പെണ്‍‌കുട്ടിയുടെ വിലാപം

2007-12-17T08:08:00.000+03:00

തൂക്കുമരത്തിലേക്കു പോകുന്ന
നിന്നെ നോക്കി ഒരു നക്ഷത്രം പറയുന്നു
നീയെനിക്കായൊന്നു പുഞ്ചിരിക്കുമെങ്കില്‍
ഞാന്‍ മറക്കാം... എല്ലാം മറക്കാം... ക്ഷമിക്കാം...

സ്‌നേഹത്തിന്‍ കെണിയില്‍ വീഴ്‌ത്തിയതും
അമ്മയുടെ പ്രതീക്ഷകള്‍ കാറ്റില്‍ പറത്തിയതും
അച്‌ഛന്റെ ചില്ലുകൊട്ടാരം തട്ടിയുടച്ചതും
എന്നെ ഞാന്‍ നിനക്കായ് വിലപറയാതെ തന്നതും

നിന്നുയര്‍‌ച്ചക്കുവേണ്ടി ഞാന്‍
നിശബ്‌ദയായിരുന്നതും കിടന്നതും
നീയെന്നെ നാടും നഗരവും കൊണ്ടു നടന്നതും

നിന്റെ ആയിരം വിരലുകള്‍
എന്റെ കഴുത്തു ഞെരിച്ചതും

ആരോരും അറിയാതെ പാളത്തില്‍ തള്ളി
ട്രെയിനിന്റെ ശബ്‌ദത്തില്‍ ഓടി ഒളിച്ചതും

ഞാന്‍ മറക്കാം... എല്ലാം മറക്കാം... ക്ഷമിക്കാം...
നീയെനിക്കായൊന്നു പുഞ്ചിരിക്കുമെങ്കില്‍...

എങ്കിലും ഞാനൊന്നു ചോദിക്കട്ടെ
നീയെന്നെ സ്‌നേഹിച്ചിരുന്നുവോ ?
നിനക്കാരെയെങ്കിലും സ്‌നേഹിക്കാനാവുമോ ?

തകരുന്ന പാലങ്ങളും കാരണങ്ങളും

2007-11-26T09:49:00.000+03:00

ഈ പാലത്തിന് അന്‍‌പതു വര്‍‌ഷത്തിന്മേല്‍ പ്രായമുണ്ട്. വല്ല ബലക്ഷയവും.
ചാനല്‍ ക്യാമറയ്‌ക്ക് പാലത്തിലൂടെ പോകുമ്പോള്‍ വെറുതെ തോന്നിയ സംശയം.
അടുത്ത അന്വേഷണ റിപ്പോര്‍‌ട്ട് ഇതു തന്നെയാകട്ടെ.
“തകരുന്ന പാലങ്ങളും കാരണങ്ങളും”

ക്യാമറക്കണ്ണുകള്‍ പാലത്തിനു മുകളില്‍ നിന്ന് പലദൃശ്യങ്ങള്‍ പകര്‍‌ത്തി.
ഇരു കരയിലും നിറഞ്ഞ പച്ചപ്പ്.
ഒഴുക്കിന്റെ കള കളാരവം ശ്രദ്ധിച്ചാല്‍ കേള്‍ക്കാം.
വിദേശ നിര്‍‌മ്മിതകാറുകള്‍ പാലത്തിലൂടെ പോകുന്നു.
വലിയ ചരക്കുലോറികള്‍ പോകുമ്പോള്‍ പാലം കുലുങ്ങുന്നുണ്ട്.

പാലത്തിന്റെ അടിയില്‍ പോയി നോക്കണം.
അവിടെ മുന്‍‌പ്‌ കുട്ടികള്‍ ചീട്ടുകളിച്ചിരുന്നു.
ഇന്ന് ആരും അങ്ങോട്ടു പോകാറില്ല.
അവിടെ മുഴുവന്‍ കാടുപിടിച്ചു കിടക്കുകയാണ്.

പാലത്തിന്റെ ഒരരുകിലുള്ള ഇടവഴിയിലൂടെ പാലത്തിന്റെ അടിയിലെത്തി.
പാലത്തിന് ബലക്ഷയം ഉണ്ട്.
പലതാണ് കാരണം.
മണ്ണുവാരല്‍ മൂലം തൂണുകളുടെ അടിഭാഗം വളരെ താണിരിക്കുന്നു.
സിമെന്റു പൊട്ടി തുരുമ്പിച്ച കമ്പികള്‍ പുറത്തേക്കുന്തി നില്‍ക്കുന്നു.

ഗവണ്മെന്റ് കോണ്‍‌ട്രാക്‌ടറും മുന്‍‌സിപ്പല്‍ കൌണ്‍‌സിലിലെ വനിതാമെമ്പറും പാലത്തിനടിയില്‍ നില്‍ക്കുന്നത് ക്യാമറക്കണ്ണുകള്‍ കണ്ടു.
ഇവര്‍ ഇവിടെ എന്തെടുക്കുകയാണ് ?
സംശയകരമായ സാഹചര്യത്തില്‍ ക്യാമറ അവരെ കാണുവാന്‍ പാടില്ലായിരുന്നു.

എങ്കിലും പാലം തകരുന്നതിനുള്ള യഥാര്‍‌ത്ഥ കാരണം കണ്ടെത്തുവാനായി.
അധികാരികളും കോണ്‍‌ട്രാക്‌ടര്‍‌മാരും തമ്മിലുള്ള അവിഹിത കൂട്ടുകെട്ടുമൂലമാണ് പാലങ്ങള്‍ തകരുന്നത്.

അത്രയും റെക്കോര്‍‌ഡു ചെയ്‌ത കാസ്സറ്റ് കോണ്‍‌ട്രാക്‌ടറെ ഏല്‍‌പ്പിച്ച് പതിനായിരത്തിന്റെ ചെക്കും വാങ്ങിപോരുമ്പോള്‍, ക്യാമറ പല പ്രാവശ്യം പറഞ്ഞ് സ്വയം വിശ്വസിക്കാന്‍ ശ്രമിച്ചു.
“ പാലത്തിന്റെ ബലക്ഷയത്തെപ്പറ്റി പഠിക്കാനാണ് അവര്‍ വന്നത്”

സ്‌പെയര്‍ പാട്‌സ്

2007-11-22T10:04:00.000+03:00

ആറ് ആണ്‍‌മക്കളും മൂന്ന് പെണ്‍‌മക്കളും ഉള്ള അപ്പച്ചന്‍ ആശുപത്രിയില്‍ മരിക്കുമ്പോള്‍ കരയാനും പതം പറയാനും മക്കളും ബന്ധുക്കളും ആരും ഉണ്ടായിരുന്നില്ല.
മക്കളെല്ലാം വിദേശത്താണ്, വളരെത്തിരക്കിലും......

അടുത്തുനിന്ന നേഴ്‌സുപെണ്ണു മാത്രം കരഞ്ഞു.
“അയ്യോ........, അപ്പച്ചന്‍ ഇത്ര വേഗം മരിച്ചുവോ ........!”
ദിവസങ്ങള്‍ മാത്രം പരിചരിച്ച നേഴ്‌സ്‌പെണ്ണിന് അപ്പച്ചനോട് ഇത്ര അടുപ്പമോ?
അപ്പച്ചന്റെ ഡെഡ് ബോഡി മറവുചെയ്യാനായി മുന്‍‌സിപ്പാലിറ്റിക്കാര്‍ കൊണ്ടു പോകുമ്പോഴും അവള്‍ കരയുകയായിരുന്നു.
അവള്‍ കരയുന്നതിനുള്ള കാരണം തിരക്കാന്‍ പോലും ആരും ഉണ്ടായിരുന്നില്ല.

വൈകിട്ട് അവള്‍ ഡയറിയില്‍ എഴുതി..“ഇന്നു മരിച്ച അപ്പച്ചന്റെ സ്‌പെയര്‍ പാട്‌സ് എടുക്കുവാനുള്ള സമ്മതപത്രത്തില്‍ മരിക്കുന്നതിനു മുന്‍‌പ്‌ അപ്പച്ചന്റെ ഒപ്പു വാങ്ങിക്കാഞ്ഞതില്‍ ഡോക്‌ടര്‍ തന്നെ ഒത്തിരി വഴക്കു പറഞ്ഞു അതിനാല്‍ എനിക്ക് സങ്കടംവന്ന് ഞാന്‍ കരഞ്ഞു”

ചതിയന്‍ കാമുകന്‍

2007-11-16T05:19:00.000+03:00

നാല്‍പ്പത്തി രണ്ടാം നമ്പര്‍ റൂമില്‍ ആദ്യമായാണ് കയറുന്നത്.
"നീ ഇവിടെ എത്തിയതെങ്ങനെയാണ്"
ഒരു തുടക്കത്തിനായ് വെറുതെ ലോഹ്യം ചോദിച്ചതാണ്
"എന്റെ കാമുകന്‍ ചതിച്ചതാണ്"
അവളുടെ മുഖത്തേക്കു സൂക്ഷിച്ചു നോക്കി.
ഇത് അവള്‍ത്തന്നെ...........
പണം കൊടുത്ത് ഇറങ്ങി ഓടി......
അവള്‍ തന്നെ തിരിച്ചറിഞ്ഞിട്ടുണ്ടാകുമോ ?

അന്വേഷണം

2007-11-09T08:17:00.000+03:00

അന്വേഷണം
അത് അനന്തമായ പ്രക്രീയ.

ആത്‌മാര്‍‌ത്ഥത മരിച്ചിട്ടെത്ര നാളായി?
എടുത്തു വെച്ച പടങ്ങളൊന്നുമില്ല.
ഓര്‍മ്മയില്‍ പോലുമില്ല

ജനനവും മരണവും എല്ലാം ചടങ്ങുകള്
‍നേര്‍ വരയിലൂടെ തിരക്കഥ തെറ്റാത്ത ജീവിതം
പുഞ്ചിരിയും പ്രണയവും എല്ലാം യാന്ത്രികം

ഒരു തിരിച്ചു പോക്ക്
തനിമയിലേക്ക്,
സ്വഭാവികതയിലേക്ക്.
ഒരു തിരിച്ചു പോക്ക്
അതുണ്ടാകുമോ ?

പവര്‍ ഡിസ്‌ക്കണക്‌ടു ചെയ്‌തു.
ഒരു യന്ത്രം ഇതില്‍ക്കൂടുതല്‍
ആലോചിക്കരുത്.

കുഞ്ഞനും മാലാഖയും

2007-11-06T13:26:00.001+03:00

ഒരു മാലാഖ യാദൃശ്‌ചിഛികമായി ഭൂമിയില്‍ വന്നു.

കുഞ്ഞന്‍ ആദ്യമായാണ് മാലാഖയെ കാണുന്നത്.
നല്ല ശുഭ്രവസ്‌ത്രം ധരിച്ച, തിളങ്ങുന്ന കണ്ണൂകളുള്ള മാലാഖ.
കണ്ണുകള്‍‌ക്കെന്തൊരു വശ്യ ശക്‌തി,
മാലാഖ ചിരിക്കുമ്പോള്‍ പവിഴം പൊഴിയും
ആറു ചിറകുകളും ഒന്നിനൊന്നു മെച്ചം,
ശിരസ്സിനു ചുറ്റുമുള്ള ദിവ്യപ്രഭ മാലാഖയെ കൂടുതല്‍ മനോഹരിയാക്കുന്നു.

“ നീ എവിടെ നിന്നു വരുന്നു “ കുഞ്ഞന്‍ ചോദിച്ചു
“ഞാന്‍ സ്വര്‍ഗ്ഗത്തില്‍ നിന്നും വരുന്നു” മാലാഖ പറഞ്ഞു.
“സ്വര്‍ഗ്ഗമോ അതെവിടെയാ” കുഞ്ഞന്‍ ആദ്യമായാണ് സ്വര്‍ഗ്ഗത്തെപ്പറ്റി കേള്‍ക്കുന്നത്.

മാലാഖ ഒന്നര മണിക്കൂര്‍ കൊണ്ട് സ്വര്‍ഗ്ഗത്തെപ്പറ്റി ചുരുങ്ങിയ വാക്കുകളില്‍ വിവരിച്ചു.

സ്വര്‍ഗ്ഗത്തില്‍ എല്ലാവരും സന്തോഷവാന്മാരാണെന്നു കേട്ടപ്പോള്‍ കുഞ്ഞനും സ്വര്‍ഗ്ഗത്തില്‍ പോകാന്‍ ആഗ്രഹം തോന്നി.

സ്വര്‍ഗ്ഗത്തില്‍ പോകാന്‍ ആഗ്രഹമില്ലാത്തവര്‍ ആരെങ്കിലും ഉണ്ടോ?

കുഞ്ഞനെ സ്വര്‍ഗ്ഗത്തില്‍ കൊണ്ടു പോകാമെന്ന് മാലാഖ സമ്മതിച്ചു.

“സ്വര്‍ഗ്ഗത്തില്‍ പോകണമെങ്കില്‍ മരിക്കണം. ഇപ്പോള്‍ മരിച്ചവര്‍ക്കു മാത്രമെ സ്വര്‍‌ഗ്ഗത്തില്‍ പ്രവേശനമുള്ളൂ” മാലാഖ പറഞ്ഞു.

സ്വര്‍ഗ്ഗത്തില്‍ പോകാന്‍‌വേണ്ടി മരിക്കാനും കുഞ്ഞന്‍ തയ്യാറായിരുന്നു.

മരിക്കുന്നതിനു മുമ്പ് കുഞ്ഞന്‍ അവസാനത്തെ ആഗ്രഹം ഒരു സംശയമായിരുന്നു.

“സ്വര്‍ഗ്ഗത്തില്‍ ബ്ലോഗ്ഗുണ്ടൊ ?” കുഞ്ഞന്‍ ചോദിച്ചു.

“ എന്താ ഈ ബ്ലോഗ്ഗ് “ മാലാഖയ്‌ക്ക് ബ്ലൊഗ്ഗിനെപ്പറ്റി അറിയില്ലായിരുന്നു.
കുഞ്ഞന്‍ മാലാഖയ്‌ക്ക് രണ്ടര മണിക്കൂര്‍ ബ്ലോഗ്ഗിനെപ്പറ്റി ക്ലാസ്സെടുത്തു.

“ബ്ലോഗ്ഗു നല്ലതാണ് പക്ഷേ സ്വര്‍ഗ്ഗത്തില്‍ ബ്ലോഗ്ഗില്ല” മാലാഖ പറഞ്ഞു.

കുഞ്ഞന്റെ മറുപടി ഉടന്‍ ഉണ്ടായി.
“നമുക്കിവിടെ വെച്ച് പിരിയാം ബ്ലോഗ്ഗില്ലാത്ത സ്വര്‍ഗ്ഗത്തിലേക്ക് ഞാനില്ല, ഗുഡ് ബൈ”

കാണായ്‌മയുടെ കാഴ്‌ച

2007-10-31T17:21:00.000+03:00

ജലത്തില്‍ ജലമല്ലാതെ എന്തു കാണുന്നു ?
ജലത്തില്‍ ജലമല്ലാതെ എന്തു കാണാന്‍
ജലത്തിലെ വിഷാംശങ്ങളും രോഗാണുക്കളും
അതു കുടിച്ചു മക്കള്‍ മരിക്കുന്നതും
ജലം വിഘടിക്കുന്നതും ഇല്ലാതാകുന്നതും
ജലത്തിനു വേണ്ടി ഉണ്ടാകാന്‍ പോകുന്ന യുദ്ധങ്ങളും
നീ കാണണം

മരത്തില്‍ നീ എന്തു കാണുന്നു ?
മരമല്ലാതെ എന്തു കാണാന്‍
മരത്തിന്‍ സിരകളില്‍ രക്‌തം പൊടിക്കുന്നതും
കടപുഴകി വീഴുന്നതും
ഭൂമിതന്നെ ഒലിച്ചു പോകുന്നതും
നീ കാണണം

ആകാശത്തില്‍ നീ എന്തു കാണുന്നു ?
മേഘങ്ങളല്ലാതെ എന്തു കാണാന്‍
സൂര്യനേക്കാള്‍ വലിയ സൂര്യനെ നീ കാണുക
ഓസോണിന്‍ മുറിവുകള്‍ നീ കാണുക
നിന്നെ ദഹിപ്പിക്കാന്‍ പോരുന്ന തീമഴ നീ കാണുക

എനിക്കിതൊന്നും കാണുവാന്‍ കഴിയില്ല
കാണായ്‌മയുടെ കാഴ്‌ചയെനിക്കില്ല
ചൂഴ്‌ന്നെടുത്തോളൂ എന്‍ കണ്‍‌കളെ

ഉറക്കത്തിലെ പേടി

2007-10-31T12:00:00.000+03:00

തണുപ്പുള്ള രാത്രിയില്‍
കുട്ടന് ഉറക്കം വന്നില്ല
എന്തൊക്കയോ പേടികള്‍
മുറ്റത്ത് എന്തൊക്കയോ ശബ്‌ദങ്ങള്‍

കോഴിക്കൂട് അടച്ചിരുന്നു
എന്നിട്ടും
കോഴികള്‍ പേടിച്ച് കരയുന്നു

ചില ദിവസങ്ങളില്‍
കുറുക്കന്‍ കോഴിയെപ്പിടിക്കാന്‍ വരാറുണ്ട്
കുറുക്കനും അമ്മയെ പേടികാണും
അമ്മ ഉണരേണ്ട
ഉണര്‍‌ന്നാല്‍
കുറുക്കനെ എറിഞ്ഞോടിക്കും

വല്ല കള്ളനും മോഷ്‌ടിക്കാന്‍ വന്നതാണോ?
അച്‌ഛനെ പേടിയില്ലാത്ത കള്ളനൊ !
അച്‌ഛന്‍ വീട്ടിലില്ലാത്തതു ഭാഗ്യം
അച്‌ഛന്‍ ഏതു കള്ളനേയും ഓടിച്ചിട്ടു പിടിക്കും
അച്‌ഛനും പേടിയുണ്ടാകുമോ?

അമ്മ ഉറക്കത്തില്‍ പറഞ്ഞു
മോനെ പേടിക്കേണ്ട....
കണ്ണടച്ച് ഉറങ്ങിക്കോ.....
ഞാനില്ലിയോ നിനക്ക്....
ഉറങ്ങുന്ന അമ്മയ്‌ക്ക് പേടിയില്ല
കുട്ടന്‍ അമ്മയോട് ചേര്‍‌ന്നു കിടന്നുറങ്ങി.

കോഴി

2007-10-21T18:38:00.000+03:00

ചികയാറില്ല
മുട്ടയിടാറില്ല
മുട്ടയ്‌ക്ക് അടയിരിക്കാറില്ല
ചിറകുകളില്ല, തൂവലും
പുരപ്പുറത്തുകയറി കൂവാറില്ല
കൂവിയാലൊട്ടു നേരം വെളുക്കുകയുമില്ല.

എന്നിട്ടും നിങ്ങള്‍ പറയുന്നു
കോഴിയാണ് കോഴി.

ഓടിച്ചിട്ടു തല്ലിക്കൊന്നു
കെട്ടിത്തൂക്കിയതും ഇറച്ചിക്കടയില്‍
കോഴിയിറച്ചിയുടെ വില പോലും ഇല്ലായിരുന്നു
ആരും വില ചോദിച്ചില്ല, വാങ്ങിയില്ല

എന്നിട്ടും നിങ്ങള്‍ പറയുന്നു
കോഴിയാണ് കോഴി.

അവസാനത്തെ ആഗ്രഹം

2007-10-18T19:08:00.000+03:00

കര്‍ഷകന്‍

മലബാറിലെ കുടിയേറ്റ കര്‍ഷകരുടെ മക്കള്‍
കൃഷി ചെയ്‌താണ് കടബാദ്‌ധ്യതയുള്ളവരായത്
കൃഷി ചെയ്‌താല്‍ കടക്കാരാകുമോ?
‘കടം’ കൃഷി ചെയ്‌താല്‍ കടമല്ലേ കൊയ്യാനാവൂ....
കടക്കെണിയില്‍ പെട്ട് ജീവിതം വഴിമുട്ടി
ആത്‌മഹത്യ ചെയ്യുവാനുള്ള ധൈര്യം പോലും അവര്‍ക്കില്ലായിരുന്നു.
ഓടിയൊളിക്കുവാന്‍ കാടുകളൊന്നും കണ്ടില്ല.

ചിലര്‍ നഗരങ്ങളിലെ വ്യവസായങ്ങള്‍ക്ക് തണലായി
മറ്റു ചിലര്‍ എണ്ണയുടെ നാട്ടിലെ ഒട്ടകങ്ങള്‍ക്ക് കൂട്ടായി
മലബാറില്‍ ബാക്കിയുണ്ടായിരുന്ന എല്ലാവരേയും സായിപ്പിന്റെ പട്ടാളത്തില്‍ ചേര്‍ത്തു
ഗ്രീന്‍ കാര്‍ഡ് കൊടുത്ത് ലോകം മുഴുവന്‍ വിന്യസിച്ചു
യുദ്ധം ചെയ്യുവാനല്ല, യുദ്ധം ചെയ്യുവാന്‍ അവര്‍ക്കറിയുകയുമില്ലല്ലോ!
യുദ്ധപ്പറമ്പിലെ ശവങ്ങള്‍ പെറുക്കിക്കൂട്ടുകയാണ് ജോലി
ഓരോ ദിവസവും വൈകിട്ട് കണക്കു കൊടുക്കണം
ജോലിക്കനുസരിച്ച് കൂലി കിട്ടും
ശവങ്ങള്‍ പെറുക്കിക്കൂട്ടുവാന്‍ അവര്‍ മത്‌സരിച്ചു

മലബാര്‍ ഏതോ സായിപ്പ് പാട്ടത്തിനെടുത്തു
ഉഴുതുമറിച്ചു, ശാസ്‌ത്രീയമായി കൃഷി ആരംഭിച്ചു
കപ്പയും കാച്ചിലും ചേനയും തുടങ്ങി എല്ലാം കൃഷി ചെയ്‌തു
ലോകം വിശപ്പിനു മുന്നില്‍ മുട്ടുമടക്കുന്ന ദിവസത്തിനായി
സായിപ്പ്‌ കാത്തിരുന്നു
കര്‍ഷക സായിപ്പ് കാത്തിരുന്നു

ടൂറിസം വാരാഘോഷം

കൊച്ചിയില്‍ നടന്ന ടൂറിസം വാരാഘോഷത്തിന്റെ ഭാഗമായി ജാനു ഗര്‍ഭിണിയായപ്പോള്‍ ആഘോഷക്കമ്മറ്റിക്കാര്‍ തെല്ലൊന്ന് വിഷമിച്ചു.
കല്ല്യാണം കഴിക്കാത്ത ജാനുവിനു കുട്ടിയുണ്ടായാല്‍ .....
കുട്ടിയുടെ പിതൃത്വം..... കുട്ടിയുടെ ഭാവി........
സായിപ്പിന്റെ കയ്യില്‍ എല്ലാത്തിനും ഉത്തരം ഉണ്ടായിരുന്നു
ഉണ്ടാകാന്‍ പോകുന്നകുട്ടി തന്റെ കുട്ടിയാണെന്നും കുട്ടിയെ ലോക പോലീസില്‍ ചേര്‍ത്തിരിക്കുന്നു വെന്നും സായിപ്പ് സര്‍ട്ടിഫിക്കേറ്റ് നല്‍കി.
ഇത്തരം സര്‍ട്ടിഫിക്കേറ്റുകളുടെ ആയിരക്കണക്കിനു കോപ്പികള്‍ കണ്ടപ്പോള്‍ ആഘോഷക്കമ്മറ്റിക്കാര്‍ക്ക് ആശ്വാസമായി.

അവസാനത്തെ ആഗ്രഹം

ദൈവം ഒരു മലയാളിയുടെ മുമ്പില്‍ പ്രത്യക്ഷപ്പെട്ടു പറഞ്ഞു
“നാം നിന്റെ ജീവന്‍ എടുക്കാന്‍ പോകുകയാണ് “

മലയാളിക്ക് കരച്ചില്‍ വന്നു
“ദൈവംതമ്പുരാനെ ഇപ്പോഴേ എന്റെ ജീവനെടുക്കരുതേ എനിക്ക് ജീവിച്ച് കൊതിതീര്‍ന്നിട്ടില്ല”

ദൈവം കാര്യം വിശദീകരിച്ചു
“ഇല്ല മകനേ നിന്റെ സമയം കഴിഞ്ഞു, നീ മരിക്കേണ്ടത് അനിവാര്യമാണ്. അവസാനമായി നിനക്ക് എന്തെങ്കിലും ആഗ്രഹമുണ്ടെങ്കില്‍ പറയൂ”

മലയാളി ബുദ്ധിമാനാണേ! തെല്ലൊന്ന് ആലോചിച്ച ശേഷം അവന്‍ അവസാന ആഗ്രഹം പറഞ്ഞു
“ദൈവമേ അധിനിവേശം തൊട്ടശുദ്ധമാക്കാത്ത ഒരു പെണ്ണിന്റെ കൂടെ അന്തിയുറങ്ങിയിട്ട് മരിച്ചാല്‍ മതി”

മലയാളിയും ദൈവവും കൂടി ലോകം മുഴുവന്‍ അന്വേക്ഷിച്ചിട്ടും അങ്ങനെ ഒരുവളെ കണ്ടെത്താനായില്ല.

മലയാളിയുടെ ആഗ്രഹം നിവര്‍ത്തിച്ചു കൊടുക്കുവാനാകാതെ ദൈവം നാണിച്ച് തോല്‍‌വി സമ്മതിച്ചു.

ആഗ്രഹങ്ങളുടെ പുസ്‌തകം

2007-10-11T13:09:00.000+03:00

സാധാരണക്കാരന്റെ ചെറിയ ചെറിയ ആവശ്യങ്ങളായിരുന്നു അവന്റെ സ്വപ്‌നങ്ങള്‍.
ആഗ്രഹിക്കാന്‍ പാടില്ലാത്തതൊന്നും ആഗ്രഹിച്ചില്ല.

വിവാഹപ്രായം കഴിഞ്ഞു നില്‍ക്കുന്ന സഹോദരിമാര്‍‌ക്കൊരു ജീവിതം.
ബാങ്കുലോണ്‍ പലിശയടക്കം തിരിച്ചടച്ച് തന്റെ വസ്‌തുവിന്റെ ആധാരം ബാങ്കില്‍ നിന്നും തിരിച്ചെടുക്കണം.
അതേ ബാങ്കില്‍ തന്നെ അല്പം സ്‌ഥിര നിക്ഷേപവും ഇടണം
വീടൊന്നു പുതുക്കിപ്പണിയണം.
കുഞ്ഞുന്നാള്‍ മുതല്‍ ആഗ്രഹിച്ച കളിക്കൂട്ടുകാരിയെ സ്വന്തമാക്കണം.
പ്രായമായ മാതാ പിതാക്കള്‍ക്ക് വാര്‍ദ്ധക്യത്തില്‍ അത്താണിയാകണം.
നാട്ടില്‍ തിരിച്ചു ചെന്ന് ചെറിയെന്തെങ്കിലും ബിസ്സിനസ്സു ചെയ്ത് ജീവിക്കാനൊരു സ്‌ഥിര വരുമാനം ഉണ്ടാക്കണം.

അങ്ങനെ കുറെ സ്വപ്‌നങ്ങളുമായാണ് അറബിനാട്ടില്‍ ജോലി തേടിയെത്തിയത്‌.
വിസായിക്കും വിമാന ടിക്കറ്റിനും അച്‌ഛന്‍ ആരില്‍ നിന്നൊക്കെയോ കടം വാങ്ങി.

ഒരു വര്‍ഷത്തോളം ആത്‌മാര്‍ത്ഥമായി ജോലി ചെയ്തു. അത്രയുമേ ചെയ്യേണ്ടി വന്നുള്ളു.

ജോലി ചെയ്തു കൊണ്ടിരുന്ന ഇരുനിലക്കെട്ടിടത്തിന്റെ മുകളില്‍ നിന്നും താഴെ വീണപ്പോള്‍ ജീവന്‍ തിരിച്ചു കിട്ടുമെന്നു വിചാരിച്ചില്ല.
ഗള്‍ഫിലെ ആശുപത്രിയില്‍ ആറുമാസത്തെ ചികിത്‌സക്കു ശേഷം കൂട്ടുകാര്‍ പിരിവെടുത്തു വാങ്ങിക്കൊടുത്ത ടിക്കറ്റില്‍ തിരികെ നാട്ടിലെത്തി.

നാട്ടിലേക്കുള്ള യാത്രയ്‌ക്കു മുന്‍‌പേ ആരാണ് ആ സമ്മാനം കൊടുത്തതെന്ന്‌ ഓര്‍മ്മയില്ല.
അതില്‍ എല്ലാം ഉണ്ടായിരുന്നു.
സമ്പത്തും , കാറും , വീടും, ബാങ്ക് ഡിപ്പോസിറ്റും, എല്ലാം എല്ലാം ....
ജീവിതവും, വിവാഹവും, സന്തോഷവും, സമാധാനവും എല്ലാം എല്ലാം.........
ഒരു മനുഷ്യന് എന്തെല്ലാം ആഗ്രഹിക്കാമോ അതെല്ലാം അതിലുണ്ടായിരുന്നു.

ഡിക്‌ഷണറിയില്‍ ഇല്ലാത്തത് എന്താണ് ? എല്ലാം അതിലുണ്ടായിരുന്നു.

സമ്മാനമായിക്കിട്ടിയ ഡിക്‌ഷണറി നെഞ്ചോടടുക്കിപ്പിടിച്ച് എഴുന്നേല്‍ക്കാന്‍ ശക്‌തിയില്ലാത്ത കാലുകളെ നോക്കി അവന്‍ ശബ്‌ദമില്ലാതെ കരഞ്ഞു.

രാജ്യദ്രോഹക്കുറ്റം

2007-10-10T07:50:00.000+03:00

രാജ്യദ്രോഹക്കുറ്റം ചുമത്തപ്പെട്ടവനാണ് പ്രതി.

രാജാവ് നഗ്‌നനാണെന്നു വിളിച്ചു പറഞ്ഞവനെ തൂക്കിലേറ്റേണ്ടത് രാജനീതി.
തൂക്കുമരത്തില്‍ കുറഞ്ഞെന്ത് ശിക്ഷയാണ് നല്‍കുക.
നീ വെറും പ്രജ. നിനക്ക് ഉണ്ണാനും സ്വസ്ഥമായി ഉറങ്ങാനുമുള്ള സൌകര്യം രാജ്യത്തുണ്ടായിരുന്നല്ലോ?
പിന്നെ നീയെന്തിനാണ് രാജ്യകാര്യങ്ങളില്‍ ന്യായം പറയാന്‍ നിന്നത് ?

മാതൃകാ പരമായി അവനെ തൂക്കിലേറ്റുന്നത് മറ്റു പ്രജകള്‍‌ക്കൊരു താക്കീതാകുമെന്ന് വാദിഭാഗം വാദിച്ചു.
താക്കീതു നല്‍കി പറഞ്ഞയക്കണമെന്ന് പ്രതിഭാഗം അപേക്ഷിച്ചു.
സത്യം പറഞ്ഞതിന്റെ പേരില്‍ മരണം വരിക്കാനും പ്രതി തയ്യാറായിരുന്നു.
രാജാവും നിയമപുസ്‌തകവും മാത്രമാണ് ശരിയെന്ന് ജഡ്‌ജി വിശ്വസിച്ചു.

നീണ്ട വാദപ്രതി വാദങ്ങള്‍‌ക്കൊടുവില്‍ ജഡ്‌ജി വിധി പ്രഖാപിച്ചു.
നാലു ലക്ഷം രൂപാ പിഴയും ജീവപര്യന്തം കഠിന തടവും.
ഒരിക്കല്‍ക്കൂടി കണ്ണുകെട്ടിയ ദേവത വെറും മരപ്പാവയായി രാജനീതിയ്‌ക്ക് കൂട്ടുനിന്നു.

നീതികള്‍ മാറിമറിയുമെന്ന് പ്രതി മാത്രം സ്വപ്‌നം കണ്ടു.
ഇന്നത്തെ ശരികള്‍ എന്നും ശരിയായിരിക്കില്ലെന്ന് പ്രതിക്കറിയാം.
ഭടന്മാര്‍ പ്രതിയെ തടവറയിലേക്ക് കൂട്ടിക്കൊണ്ടു പോയി.
തടവറയുടെ ഇരുമ്പഴികളിലൂടെ ആകാശവും അതിലുള്ള നക്ഷത്രങ്ങലേയും പ്രതിക്ക് കാണാമായിരുന്നു.

ജഡ്‌ജി കോടതി മുറിയില്‍ തളര്‍‌ന്നു വീഴുമ്പോള്‍ ദാഹജലത്തിനായി കേണത് ആരും കേട്ടില്ല.
ആരൊക്കയോ താങ്ങി ആശുപത്രിയിലാക്കി.
ലക്ഷങ്ങള്‍ മുടക്കി ചികിത്സ ചെയ്‌തിട്ടും ഫലമുണ്ടായില്ല.
ജീവപര്യന്തം ഒരേ കിടപ്പില്‍ കിടക്കേണ്ടി വരുമെന്ന് ഡോക്‌ടര്‍മാര്‍ വിധിച്ചു.
വര്‍ഷങ്ങളോളം ഒരേ മരവിച്ച കിടപ്പില്‍ ജഡ്‌ജി കിടന്നു.

ജഡ്‌ജി ഓര്‍മ്മയുടെ പുസ്‌തകം മറിച്ചു നോക്കി.
താന്‍ ആര്‍‌ക്കെങ്കിലും ദയാവധം വിധിച്ചിട്ടുണ്ടോ?
ദയാവധത്തിന് നിയമ സാധുതയുണ്ടോ?

പ്രവാസലോകം

2007-10-04T18:33:00.000+03:00

ഗള്‍ഫ് മരുഭൂമിയുടെ ഉള്‍ഗ്രാമത്തില്‍ കുറെ കാട്ടറബികളും ഒട്ടകങ്ങളും താമസിക്കുന്നിടത്ത് ഒരു മലയാളിയൊ ?

വിദേശത്ത് കാണാതാവുന്നവരെ അന്വേഷിക്കുന്ന പ്രവാസലോകമെന്ന ടി.വി. പരിപാടിയില്‍ കഴിഞ്ഞ ആഴ്‌ച കണ്ട അതേ മുഖം.
ഇരുപത്തിരണ്ടു വര്‍ഷത്തിന്റേതായ വലിയ മാറ്റങ്ങളൊന്നും ആ മുഖത്ത് കാണാനില്ല.

ചോദ്യങ്ങള്‍‌ക്കൊന്നും അവന് ഉത്തരമില്ല. ചിലപ്പോള്‍ തലകുലുക്കും. ചില ചോദ്യങ്ങളുടെ ഉത്തരം ഒരു മൂളലായിരിക്കും.

ആ മുഖത്തെ ദൈന്യഭാവം ഉത്തരമാകുന്ന ചോദ്യം ഏതാണ് ?

ഒട്ടകങ്ങളെ മേയിച്ചു നടന്ന് അവയുടെ ഭാഷ മാത്രമേ മനസ്സിലാകൂ എന്നുണ്ടോ ?

ജീവിക്കുവാന്‍ വേണ്ടി അറിയാത്ത ദേശത്തേക്ക് കടലുതാണ്ടിയെത്തിയവന്‍.
ചരക്കു കപ്പലില്‍ ഒരായിരം പ്രതീക്ഷകളുമായി തീരമണഞ്ഞവന്‍.
സ്വന്തം അസ്‌തിത്വം തെളിയിക്കുന്ന പ്രധാന രേഖയായ പാസ്സ്‌പോര്‍ട്ടു പോലും കൈയ്യിലില്ലാതെ മരുഭുമിയില്‍ വര്‍ഷങ്ങളോളം ജീവിക്കാമെന്ന് തെളിയിക്കുന്നു.
കാലത്തിന്റെ കൊടുംചൂടും തണുപ്പുമേറ്റ് പ്രതീക്ഷകള്‍ മങ്ങി, മനസ്സിലെ ഓര്‍മ്മകള്‍ മരവിച്ചു.

ഒട്ടകങ്ങള്‍ക്ക് തീറ്റ കൊടുക്കുമ്പോള്‍ അവയുടെ ഒരു നോട്ടം, ആ കണ്ണുകളില്‍ കണ്ട തിളക്കമാണ് ജീവിക്കാന്‍ പ്രേരിപ്പിക്കുന്നത്.
ഒട്ടകങ്ങളുടെ ഉടമസ്‌ഥനായ അറബിയുടെ പീഢനങ്ങള്‍ സഹിക്കേണ്ടിവരുമ്പോള്‍
നിശ്ശബ്‌ദനായി കരയാന്‍ പഠിച്ചു.
എല്ലാം സഹിക്കാന്‍ ശീലിച്ചു.

ഗള്‍ഫിന്റെ പ്രൌഡിയും ആഡംബരവും വിളിച്ചോതുന്ന വലിയ വലിയ കെട്ടിടങ്ങള്‍ കൊണ്ടു നിറഞ്ഞ പട്ടണത്തിലേക്ക്, പട്ടണത്തിന്റെ ആധുനിക സൌകര്യങ്ങളിലേക്ക് അവനെ കൊണ്ടു പോകുവാന്‍ വേണ്ടി വണ്ടിയില്‍ കയറ്റാന്‍ അല്പം നിര്‍ബ്ബന്ധിക്കേണ്ടി വന്നു.

റെക്കോര്‍‌ഡു ചെയ്‌ത പ്രവാസലോകത്തിന്റെ കാസറ്റില്‍ നിന്നും അവനേപ്പറ്റിയുള്ള ഭാഗം കാണിച്ചു. വിങ്ങിപ്പൊട്ടുന്ന മനസ്സുമായാണ് ആദ്യാവസാനം അവനതു കണ്ടത്‌.
അവന്റെ അനുജനും അനുജന്റെ മകളുമാണ് ടി. വി. യില്‍ ജ്യേഷ്‌ഠനെത്തേടി എത്തിയിരിക്കുന്നത്‌.

നഷ്‌ടപ്പെട്ട മകനെകാത്തിരുന്ന്‌ മരണം വരിച്ച അച്‌ഛന്റെയും അമ്മയുടേയും ഫോട്ടോകള്‍ ടി. വി. യുടെ സ്‌ക്രീനില്‍ തെളിഞ്ഞപ്പോള്‍ അവന്റെ മനസ്സിലെന്തായിരുന്നു?

മനസ്സില്‍ ഓര്‍മ്മകളുടെ വേലിയേറ്റം ഉണ്ടായി.
തന്റെ കുട്ടിക്കാലവും നാടും വീടും നാട്ടുകാരും അവന്റെ മനസ്സില്‍ കുളിരേകി.
തന്റെ യൌവ്വനകാലത്തിന്റെ ഓര്‍മ്മകള്‍ അവനെ അസ്വസ്‌ഥനാക്കി.

നാട്ടില്‍ പോകണമെന്നും തന്റെ കൂടെപ്പിറപ്പുകളെ കാണണമെന്നും അവന് തോന്നാതിരിക്കുമോ?

ഇവനെ നാട്ടിലേക്ക് അയയ്‌ക്കുവാനായി സന്നദ്ധ സംഘടനയുടെ ഭാരവാഹികളെ ഫോണ്‍ ചെയ്‌ത് അറിയിച്ചു , അവര്‍ ഉടന്‍ വരാമെന്നേറ്റു.

ഇരുപത്തി രണ്ടു വര്‍ഷങ്ങള്‍ക്കു ശേഷമുള്ള ലോകത്തിന്റെ മാറിയമുഖം കാണുവാനായി ടി. വി. അവന്നായി തുറന്നു വെച്ചു.
വാര്‍ത്തകളുടെ ഒരു നീണ്ട മണിക്കൂര്‍, അവന്‍ ടി. വി. യിലേക്കു തന്നെ ഉറ്റുനോക്കിക്കൊണ്ടിരുന്നു.

ഇന്നത്തെ ലോകത്തിന്റെ ഒരു നേര്‍ച്ചിത്രം ഒരു മണിക്കൂര്‍‌ക്കൊണ്ട് അവന്റെ മനസ്സില്‍ വരയ്‌ക്കപ്പെട്ടു.
ആഗോള ഭീകരതയുടേയും, അക്രമത്തിന്റെയും, ചതിയുടേയും, അറുംകൊലയുടേയും, പെണ്‍‌വാണിഭത്തിന്റെയും, പീഢനത്തിന്റെയും മറ്റും ലോകത്തില്‍ ഒരു മണിക്കൂര്‍ അവന്‍ ശ്വാസം മുട്ടിയാണിരുന്നത്‌.

മനസ്സിലെ ചിന്തകളുടെ ബഹിര്‍സ്‌ഫുരണങ്ങള്‍ മുഖത്തു വ്യക്‌തമാണ്.

അവനെ നാട്ടിലേക്ക് അയയ്‌ക്കുവാന്‍ സഹായിക്കുവാനായി സന്നദ്ധ സംഘടനയുടെ ഭാരവാഹികള്‍ വന്നു.

അവന്‍ എന്തോ ചിന്തിച്ചുറച്ച് ടി. വി. യുടെ മുന്നില്‍ നിന്നും എഴുന്നേറ്റു.
അവന്‍ ഇറങ്ങി ഓടുകയാണ്. മരുഭൂമിയുടെ ഉള്‍ഗ്രാമത്തിലേക്ക് തിരികെപ്പോകുകയാണ്.

അവന്‍ തിരികെ നോക്കി വിളിച്ചു പറഞ്ഞത് മലയാളത്തിലായിരുന്നു.
“ഒട്ടകങ്ങള്‍ മൃഗങ്ങളല്ല......... , ഒട്ടകങ്ങള്‍ മൃഗങ്ങളല്ല.......”

അന്ത്യമൊഴി

2007-09-27T13:08:00.000+03:00

മതിലുകള്‍

മനസ്സിന് മതിലുകളില്ലാത്ത സ്‌നേഹത്തിന്റെ കാലം.
സ്വാതന്ത്യത്തിന് വേലികെട്ടാത്ത കാലം.

പാറുത്തള്ള ഓടി അടുക്കളയില്‍ വന്നു.
“മോളെ ഒരിത്തിരി കടുകു വേണം.....”
ഉത്തരത്തിനൊന്നും കാത്തുനില്‍‌ക്കാതെ കുപ്പി തുറന്ന് കടുക് എടുത്തോടി.
സ്‌നേഹം കൊണ്ട്‌,
കടുകു വറുത്തു – കറിയുണ്ടാക്കി

പാറുത്തള്ള വീണ്ടും വന്നു
“മോളെ നാലു മുളക്........”
അയല്‍ വീട്ടിലെ പാട്ട തുറന്ന് നാലുമുളകെടുക്കാന്‍
പാറുത്തള്ളയ്‌ക്ക്‌ ആരുടെ സമ്മതമാണ് വേണ്ടത്
ഗ്രാമത്തിലെ വീടുകളെല്ലാം അയല്‍‌ വീടുകള്‍
എല്ലാം പാറുത്തള്ളയ്‌ക്ക് സ്വന്തം പോലെ.

പാറുത്തള്ളയുടെ മോനും ഓടി വന്നു.
അവനറിയാം ഓരോ പാട്ടയിലും എന്തൊക്കെയാണെന്ന്
ചക്കയുപ്പേരി, വാഴക്കാ ഉപ്പേരി, കളിയോടയ്‌ക്ക......
അവന്‍ ആരോടും ചോദിക്കാതെ
ഒരു കുഞ്ഞിക്കൈ നിറയെ ചക്കര പുരട്ടിയും വാരിക്കൊണ്ടോടി.
ഓട്ടത്തിന്നിടെ അവന്‍ തിരിഞ്ഞു നോക്കിയൊന്ന് ചിരിച്ചിരുന്നു.
ചക്കര പുരട്ടിയുടെ സ്‌നേഹം മനസ്സില്‍ കുറിച്ചിട്ടിരുന്നു.

കാലം മാറി
വീടിനു ചുറ്റും മതിലുകെട്ടി – മനസ്സിനും
കുരയ്‌ക്കുകയും കടിയ്‌ക്കുകയും ചെയ്യുന്ന പട്ടിയേയും വളര്‍ത്തി.
കടുക് ചോദിക്കാന്‍ വന്ന പാറുത്തള്ളയെ പട്ടി കടിച്ചു
പേയിളകി പാറുത്തള്ള ചത്തു
പാറുത്തള്ളയുടെ മോന്‍ ഉപ്പേരി ചോദിക്കാന്‍ മതിലുചാടി
കള്ളനെന്നു വിചാരിച്ച് ഒന്നേ തല്ലിയുള്ളൂ
അവന് ഒറ്റയടിക്കു ചാകുന്ന ആയുസ്സേയുണ്ടായിരുന്നുള്ളു

വീട്ടുകാരന്‍ പോലീസ് പിടിയിലായി
അജ്‌ഞാത ജഡം കടല്‍ക്കരയില്‍ അടിഞ്ഞു.

മതിലുള്ള വീട്ടിലെ വീട്ടുകാരി
ഏകയാണ് , വിധവയാണ്
കൂട്ടിന് പട്ടിയുണ്ട്‌ , പട്ടിമാത്രം

അന്ത്യമൊഴി

ഭര്‍‌ത്താവ്‌ ഭാര്യയോട്
“ നീ എം. ടി. യുടെ രണ്ടാമൂഴം വായിച്ചിട്ടുണ്ടോ ?
അല്ല , എം. ടി. ആരാണെന്ന് നിനക്കറിയാമോ ?
ഗോപന്റെ ഭാര്യ എം. ടി. യുടെ രണ്ടാമൂഴം എന്ന പുസ്‌തകമാണ് ഡോക്‌ടറേറ്റിനായി തിരഞ്ഞെടുത്തിരിക്കുന്നത്‌.
നീ, ഞാന്‍ എഴുതിയിട്ടുള്ള ഏതെങ്കിലും കവിതകള്‍ വായിച്ചിട്ടുണ്ടോ ?
അല്ല, വായിച്ചാലും നിനക്കു വല്ലതും മനസ്സിലാകുമോ ?
നീ ഗോപന്റെ ഭാര്യയേ നോക്ക്
അവള്‍ കഥകളെഴുതും കവിതകളെഴുതും
ഗോപന്റെ ഭാര്യ കവിതകള്‍ ഈണത്തില്‍ ചൊല്ലുന്നതു കേള്‍ക്കാന്‍ എന്തു രസമാണെന്നോ !
ഗോപന്റെ ഭാര്യ നിന്നേപ്പോലെ മടിച്ചിയല്ല.
രാവിലെ പത്തുമണിവരെ കിടന്നുറങ്ങുകയില്ല.
അവള്‍ രാവിലെ കുളിച്ചൊരുങ്ങി നില്‍ക്കുന്നതു കാണാന്‍ എന്തു ഭംഗിയാണെന്നോ ?
നീ ഗോപന്റെ ഭാര്യയെ കണ്ടു പഠിക്ക്
ഗോപന്റെ ഭാര്യ .....
ഗോപന്റെ ഭാര്യ.....”

ഭാര്യമനസ്സില്‍ പറഞ്ഞത് ഒരല്പം ഉറക്കെയായിപ്പോയി
“ ഗോപന്റെ ഭാര്യ വന്നോ ?
ആ കള്ളന്‍ ഇതു വരേയും അതു പറഞ്ഞില്ലല്ലോ !
ഞാന്‍ അവിടെ ഗോപനെ മാത്രമേ കണ്ടിട്ടുള്ളൂ.
ഇനിയും പോകുമ്പോള്‍ ഗോപന്റെ ഭാര്യയെ പരിചയപ്പെടണം.
ഗോപനും എന്നേപ്പോലെയാ... മടിയനാ ...! “

( അതിനുശേഷം ഭര്‍ത്താവ് ഗോപന്റെ ഭാര്യയെപ്പറ്റി സംസാരിച്ചിട്ടില്ല. )

മലയാളം അറിയാം

2007-09-22T12:06:00.000+03:00

രണ്ടു മാസം ജീവിക്കാനായി

രണ്ടു വര്‍ഷത്തെ പ്രവാസത്തിനു ശേഷം
ഗള്‍ഫില്‍ നിന്നും നാട്ടിലേക്ക് വിമാനത്തില്‍ കയറിയത്
ഒരു പാവം എലിയാണ്.

തിരുവനന്തപുരത്ത് വിമാനത്തില്‍ നിന്നും ഇറങ്ങിയത്
കൂളിംഗ് ഗ്ലാസ്സു വെച്ച
കുടവയറും കഷണ്ടിയുമുള്ള
ഒരു പുലിയാണ്.

അവധി ദിവസം

ദീപുവിന് എന്നാണ് ഒരു അവധി കിട്ടുക
നാട്ടിലായിരുന്നെങ്കില്‍ ജോലി ചെയ്യേണ്ടായിരുന്നു
ചെയ്‌താലും
ബന്ദും, ഹര്‍ത്താലും മറ്റ് അവധി ദിവസങ്ങളും കഴിഞ്ഞാല്‍
വളരെക്കുറച്ചു ദിവസങ്ങള്‍ - ഒരു റ്റൈം പാസ്.

ഇവിടെ വിമാനം ഇറങ്ങിയ അന്നു മുതല്‍
തിരിച്ചു കയറുന്നതുവരെ
വെള്ളിയാഴ്‌ച ഉള്‍‌പ്പെടെ മുന്നൂറ്റി അറുപത്തഞ്ചു ദിവസവും
പന്ത്രണ്ടു മണിക്കൂര്‍ ജോലി.

ദൈവമേ ഒരു ദിവസം അവധി കിട്ടിയിരുന്നെങ്കില്‍ ...........
ദീപു എന്നും ആഗ്രഹിക്കാറുണ്ട്, പ്രാര്‍‌ത്ഥിക്കാറുണ്ട് !
അവസാനം ദീപുവിനും മറ്റുള്ളവര്‍ക്കും
ഒരു ദിവസം അവധി കിട്ടി
എല്ലാവരും സന്തോഷിച്ചു.
ഫാക്‌ടറിയുടെ നോട്ടീസ് ബോര്‍ഡില്‍ എല്ലാവരും വായിച്ചു
“ ഇന്ന് ഫാക്‌ടറി അവധിയായിരിക്കും, ദീപുവിന്റെ അകാല നിര്യാണത്തില്‍ മാനേജ്‌മെന്റ് അനുശോചിക്കുന്നു“

മലയാളി സൂപ്പര്‍‌വൈസറുടെ ആക്രോശം കേട്ടപ്പോള്‍ എല്ലാവരുടേയും സന്തോഷം എങ്ങോ പോയിമറഞ്ഞു.
“ ഒരുത്തനും ചിരിക്കേണ്ട, ഇനിയും ഇങ്ങനെയുള്ള ദിവസങ്ങളിലും ആര്‍ക്കും അവധിയുണ്ടായിരിക്കുന്നതല്ല”

നക്ഷത്രഫലം

വെറുതെ നക്ഷത്രഫലം നോക്കി
മേടക്കൂറ് : അശ്വതി, ഭരണി, കാര്‍ത്തിക ആദ്യ പതിനഞ്ചു നാഴിക.

ഞാനും അതില്‍‌പ്പെടും – ശ്രദ്ധയോടെ വായിച്ചു തുടങ്ങി

“ ശാരീരിക ക്ലേശങ്ങളും ധനദുര്‍വ്യയവും ഉണ്ടാകുമെങ്കിലും ആഡംബര വസ്‌തുക്കള്‍ സമ്മാനമായി ലഭിക്കും, നിക്ഷേപങ്ങള്‍ക്ക് അനുകൂല സമയം...”
നാട്ടില്‍ നിന്നും അമ്മയുടെ ഫോണ്‍

“ മോനെ രണ്ടു ദിവസം കൂടി നേരത്തെ വരിക, നല്ലൊരു ശുഭമുഹൂര്‍‌ത്തം ഉണ്ട്, നിനക്കായ് ഞങ്ങളൊരു പെണ്ണുനെ കണ്ട് വാക്കു കൊടുത്തു”

മലയാളം അറിയാം

ഗാര്‍ഡനില്‍ നടക്കാന്‍ പോയപ്പോളാണ് മലയാളം അറിയാവുന്ന അറബിയെ പരിചയപ്പെട്ടത്‌.
“മലബാറി അച്ചാ ഹെ” (മലയാളികള്‍ നല്ലവരാണ് )
“മലബാറി അച്ചാ കാം കര്‍ത്താ ഹെ” (മലയാളികള്‍ ‘നല്ലപണിയാ‘ ചെയ്യുന്നത് )

“സാര്‍ യെ ഹിന്ദി ഹൈ – മലയാളം ദൂസരാ ഹൈ “ ( സാര്‍ ഇത് ഹിന്ദിയാണ് – മലയാളം വേറെയാണ്)

സുനോ മേരാ മലയാളം ( എന്റെ മലയാളം കേള്‍ക്കൂ )
“ എടാ പു........... , എടാ.........., എടാ ..............“
( അറബി പറഞ്ഞത് പച്ച മലയാളം ആയതിനാല്‍ ഇവിടെച്ചേര്‍ക്കാന്‍ സാധിക്കാത്തതില്‍ ഖേദിക്കുന്നു )
അറബിക്ക് തന്നെ മലയാളം പഠിപ്പിച്ച കേരളക്കാരെപ്പറ്റി നല്ല മതിപ്പാണ് .

ഡയറിക്കുറിപ്പുകള്‍

2007-09-18T18:19:00.000+03:00

ഡയറിക്കുറിപ്പുകള്‍

സുഹൃത്തിന്റെ ഡയറി മറിച്ചു നോക്കി
അനുഭവങ്ങളുടെ തീഷ്‌ണത വാക്കുകളില്‍
കഥയുള്ള കഥകള്‍
കവിതകള്‍ ,സാഹിത്യം
ജീവിത ദര്‍ശനങ്ങള്‍
വായിക്കുവാന്‍ താത്‌പര്യം തോന്നി
അവനൊരു ഭാവിയുണ്ടെന്നു തോന്നി
വിവാഹത്തിനു ശേഷമുള്ള പേജുകളില്‍
കൊടുത്തതും കൊടുക്കാനുള്ളതുമായ
കുറേ രൂപയുടെ കണക്കുകള്‍ മാത്രം
ആ ഡയറികള്‍ സുഹൃത്തിന്റെ വിധവയെ ഏല്‍പ്പിക്കുമ്പോള്‍
എനിക്കൊന്നും തോന്നിയില്ല.

ശാസ്‌ത്രലോകം

ഗര്‍ഭകാലത്ത്
ടി. വി. കാണുകയും
അതിനുമുമ്പിലിരുന്ന് വെറുതേ എന്തെങ്കിലും കൊറിക്കുകയും
ചെയ്യുന്ന സ്‌ത്രീകളുടെ കുട്ടികള്‍
ഭാവിയില്‍
‘വെറും വാര്‍ത്ത‘ കളായി മാറുന്നതായി
ശാസ്‌ത്രലോകം കണ്ടെത്തി
( പൂച്ചകളില്‍ നടത്തിയ പഠനം )

ഗര്‍ഭകാലത്ത്
ഭര്‍ത്താവിനോട് വഴക്കിടുകയും
കൂടുതല്‍ കുരയ്ക്കുകയും (സംസാരിക്കുക)
ചെയ്യുന്ന സ്‌ത്രീകളുടെ കുട്ടികള്‍
ഭാവിയില്‍
മന്ത്രിമാരായിത്തീരുന്നതായി
ശാസ്‌ത്രലോകം കണ്ടെത്തി
( പട്ടികളില്‍ നടത്തിയ പഠനം )

മരണം

പകല്‍ നിന്റെ അടുത്തു വരാനാകില്ല
ചില മാന്യന്മാര്‍ എന്നെ തെറ്റിദ്ധരിക്കും
രാത്രിയില്‍ നിന്റെ അടുത്തുവന്നാല്‍
നിനക്കായുള്ള ക്യൂവില്‍
പല മാന്യന്മാരെയും കാണേണ്ടി വരും
ഒരു പക്ഷേ ....
നീയും എന്നെ തെറ്റിദ്ധരിക്കും
എന്നാലും .....
ഞാന്‍ വരും... ഒരുനാള്‍....
ആരും കാണാതെ ഞാന്‍ വരും
നിന്നെയോ എനിക്കു രക്ഷിക്കാനായില്ല.
നീ പിഴച്ചു പോയി !
നിന്റെ പെണ്‍കുഞ്ഞുങ്ങളേയെങ്കിലും
എനിക്കു രക്ഷിക്കണം
അവരുടെ കഴുത്ത് ഞെരിച്ച് കൊല്ലാന്‍
ഞാന്‍ വരും....

പണപ്പെട്ടി

മകന്‍ അച്‌ഛനറിയാതെ അച്‌ഛന്റെ പണപ്പെട്ടി തുറന്നു
കുറേ നോട്ടുകള്‍ കള്ളുഷാപ്പിലേക്കോടി
കുറേ നോട്ടുകള്‍ പാല്‍ക്കാരി ജാനുവിന്റെ കുടിലിലേക്കോടി

ജാനുവാണോ മൂത്തത്‌ ജാനുവിന്റെ മകളാണോ മൂത്തത്‌ ?
മകന്‍ പണപ്പെട്ടി അടച്ച്‌ കിടന്നുറങ്ങി
സ്വപ്‌നത്തില്‍

പീഡനക്കേസില്‍പ്പെട്ട മകനുവേണ്ടി
അച്‌ഛന്‍ പണപ്പെട്ടിയുമായി
പോലീസ്‌ സ്റ്റേഷന്‍ കയറുന്നതും
കോടതിയുടെ പടിയിറങ്ങുന്നതും കണ്ടു.

ശൂന്യതയുടെ ചിരി

2007-08-25T18:40:00.000+03:00

കര ചിരിച്ചു, കേമന്‍ കരയവന്‍ ചിരിച്ചു....
കണ്ണുനീര്‍ വറ്റിയ വയലിനെ പ്രണയിച്ചു
വിശുദ്ധ പ്രണയം – അരുതെന്നാരു പറയും ?
കരയവളെ ആഴത്തില്‍ പുല്‍കി.....
ആലിംഗനത്തിന്‍ മൃഗീയതയില്‍
അവള്‍ അലിഞ്ഞു – അലിഞ്ഞില്ലാതെയായി
പ്രണയിനിയില്ലാതെ ഞാനിനി ഏകന്‍....
കര കരഞ്ഞു, കേമന്‍ കരയവന്‍ കരഞ്ഞു....

കൊടി ചിരിച്ചു, കേമിക്കൊടിയവള്‍ ചിരിച്ചു....
കണ്ണുനീര്‍ വറ്റിയ കരയെ പ്രണയിച്ചു
വിശുദ്ധ പ്രണയം – അരുതെന്നാരു പറയും ?
കൊടിയവനെ ആഴത്തില്‍ പുല്‍കി.....
ആലിംഗനത്തിന്‍ മൃഗീയതയില്‍
അവന്‍ അലിഞ്ഞു – അലിഞ്ഞില്ലാതെയായി
കാമുകനില്ലാതെ ഞാനിനി ഏകാകി.....
കൊടി കരഞ്ഞു, കേമിക്കൊടിയവള്‍ കരഞ്ഞു....

കാറ്റു ചിരിച്ചു – കടല്‍ ചിരിച്ചു
അഗ്‌നി ചിരിച്ചു – മര്‍ത്യന്‍ ചിരിച്ചു
അവസാനം ഒരു ചിരി – നിലയ്‌ക്കാത്ത ചിരി
അത്‌ ശൂന്യതയുടെ ചിരി.

ബഹറിന്‍ മീറ്റ് - ആഗസ്ത് 22

2007-08-20T00:06:00.000+03:00

പ്രീയപ്പെട്ടവരേ.. ,
ആഗസ്ത് 22 ബുധനാഴ്ച വൈകുന്നേരം 6:30 ന് ‘ബു അലി ഇന്‍ര്‍ നാഷണല്‍ ഹോട്ടലില്‍ (BU ALI INTERNATIONAL HOTEL , SALMANIYA, MANAMA).

വെറുമൊരു ബ്ലൊഗ് എഴുത്തുകാരുടെ മാത്രം കൂട്ടായ്മ എന്നതിലുപരി ‘കുടുംബ സംഗമം എന്നരീതിയിലാണ് ബഹറൈന്‍ മീറ്റ് ഒരുക്കിയിരിക്കുന്നത്.

പുതിയ ബ്ലോഗേഴ്സ്, ബ്ലോഗ് വായനക്കാര്‍, തുടങ്ങി ബൂലോകത്തിലെ എല്ലാ വിഭാഗം ആളുകളേയും ഉദ്ദേശിച്ചാണ് ബഹറൈന്‍ ബൂലോക മീറ്റ് ഒരുക്കിയിരിക്കുന്നത്.

ബഹറൈനിലുള്ള ബ്ലോഗേഴ്സിന് എത്തിച്ചേരാന്‍ വാഹന സൌകര്യം ആവശ്യമെങ്കില്‍ മുന്‍ കൂട്ടി ഫോണ്‍ ചെയ്ത് അറിയിക്കുമല്ലോ.

കൂടുതല്‍ വിവരങ്ങള്‍ക്ക്‌ വിളിക്കുക
ഇരിങ്ങല്‍ - 36360845
ബാജി - 39258308
കുഞ്ഞന്‍ - 39556987
പ്രശാന്ത്‌ - 39080674

NB : വാഹന സൌകര്യം വേണ്ടവര്‍ മുന്‍ കൂട്ടി അറിയിക്കണം.
വീഡിയോയും ഫോട്ടോയും എടുക്കുന്നുണ്ട്‌ - നന്നായി ഒരുങ്ങി വരണം.
അറിയിക്കാതെ വരുന്നവര്‍ക്ക്‌ ഫുഡ്‌കിട്ടിയില്ലെന്ന്‌ പരാതി പറയരുത്‌

ബഹറിന്‍ മലയാളം ബൂലോക കൂട്ടായ്‌മ

2007-08-16T10:54:00.000+03:00

ബഹറിന്‍ മലയാളം ബൂലോക കൂട്ടയ്‌മയുടെ രണ്ടാമത്‌ കുടുംബസംഗമം ആഗസ്‌റ്റ്‌ 22 ബുധനാഴ്‌ച വൈകിട്ട്‌ 7 മണിമുതല്‍ മനാമ സൌത്ത്‌ പാര്‍ക്ക്‌ ഹാളില്‍ നടക്കുന്നു.

ഈ മീറ്റിംഗില്‍ അവതരിപ്പിക്കുവാന്‍ വേണ്ടി തയ്യാറാക്കിയ പ്രവര്‍ത്തന രൂപരേഖ ബൂലോകരുടെ നിര്‍ദ്ദേശങ്ങള്‍ക്കായ് അവതരിപ്പിക്കുന്നു.

1. ബ്ലോഗ്ഗ്‌ ജനകീയ മാക്കുവാന്‍ വേണ്ട കൂട്ടായ പ്രവര്‍ത്തനങ്ങള്‍
ഇന്നും ബ്ലോഗ്ഗിനേപ്പറ്റി പ്രത്യേകിച്ച്‌ മലയാളം ബ്ലോഗ്ഗുകളേപ്പറ്റി വളരെക്കുറച്ചു പേര്‍ക്കു മാത്രമേ അറിയുകയുള്ളൂ എന്ന സത്യം മനസ്സിലാക്കി, ബ്ലോഗ്ഗിന്റെ സാധ്യതകള്‍ എല്ലാവരിലും എത്തിക്കുക.

2. എന്റെ മലയാളം
മാതൃഭാഷയെ കൂടുതല്‍ അറിയുവാനുള്ള അവസരങ്ങള്‍ ഉണ്ടാക്കുക. വിദേശങ്ങളില്‍ വളരുന്ന കുട്ടികളെ മലയാളം പഠിപ്പിക്കുവാന്‍ വേണ്ടി മലയാളം ക്ലാസ്സുകള്‍ സംഘടിപ്പിക്കുക.

3. മലയാളം റ്റൈപ്പിങ്ങില്‍ പരിശീലനം
കമ്പ്യൂട്ടറില്‍ മലയാളം റ്റൈപ്പിങ്ങിനാവശ്യമായ ഫോണ്ടുകളും സോഫ്‌റ്റുവയറുകളും എത്തിച്ചു കൊടുക്കുക. ഇവ നവീകരിക്കുന്നതിനാവശ്യമായ പ്രവര്‍ത്തനങ്ങളില്‍ പങ്കാളികളാകുക.

4. ബ്ലോഗ്ഗിങ്ങില്‍ പരിശീലനം
മറ്റു മാധ്യമങ്ങില്‍ എഴുതുന്നവരും പുതിയതായി എഴുതാന്‍ താത്‌പര്യം ഉള്ളവര്‍ക്കും. ബ്ലോഗ്ഗിങ്ങിന്റെ സാധ്യതകളെ പരിചയപ്പെടുത്തുകയ്യും ബ്ലോഗ്ഗിങ്ങില്‍ പരിശീലനം നല്‍കുകയും ചെയ്യുക. ബഹറിനില്‍ നൂറ്‌ സജ്ജീവ ബ്ലോഗ്ഗര്‍മാരെ വാര്‍‌ത്തെടുക്കുക.

5. ഇ-വായനാ ടിം രൂപീകരണം
മലയാളം വായനയില്‍ താത്‌പര്യം ഉള്ളവര്‍ക്ക്‌ ഇ-വായന പരിചയപ്പെടുത്തുക. ബഹറിനില്‍ ഇ-വായനക്കാരായ 1000 പേരുടെ ടിം രൂപീകരിക്കുക.

6. ബ്ലോഗ്ഗുകള്‍ പുസ്‌തക രൂപത്തില്‍
കമ്പ്യൂട്ടര്‍ / ഇന്റര്‍‌നെറ്റ്‌ സംവിധാനം ലഭ്യമല്ലാത്തവര്‍ക്ക്‌ വായിക്കുവാനായി
ബ്ലോഗ്ഗില്‍ വരുന്ന കലാമൂല്യമുള്ള സൃഷ്‌ടികള്‍ ആദ്യ ഘട്ടത്തില്‍ കമ്പ്യൂട്ടര്‍ പ്രിന്റ്‌ എടുത്തു വായനക്കായ് ലഭ്യമാക്കുകയും പിന്നീട്‌ അത്‌ പുസ്‌തക രൂപത്തില്‍ പ്രസിദ്ധീകരിക്കുകയും ചെയ്യുക

7. പ്രതിമാസ കൂടിവരവുകള്‍
കുറഞ്ഞത്‌ മാസത്തില്‍ ഒരു തവണയെങ്കിലും ഒന്നിച്ചു കൂടി പ്രവര്‍ത്തനങ്ങള്‍ വിലയിരുത്തുകയും. പുതിയ പ്രവര്‍ത്തന പരിപാടികള്‍ക്ക്‌ രൂപം നല്‍കുകയും ചെയ്യുക. കൂടിവരവുകള്‍ പരസ്‌പരം പരിചയപ്പെടുന്നതിനും സ്‌നേഹിക്കുന്നതിനും കരുതുന്നതിനുമായി പ്രയോജനപ്പെടുത്തുക.

8. കേരളാ സംഘടനകള്‍ക്ക്‌ ബ്ലോഗ്ഗ്‌ സപ്പോര്‍‌ട്ട്‌ നല്‍കുക
വിവിധ കേരളാ സംഘടനകള്‍ക്ക്‌ ബ്ലോഗ്ഗ്‌ ആരംഭിക്കുവാനും, ബ്ലോഗ്ഗിലൂടെ ആശയവിനിമയം നടത്തുവാനുമുള്ള സഹകരണം നല്‍കുക. ( ബഹറിനില്‍ പ്രേരണ – ബഹറിന്‍ എന്ന സംഘടന ബ്ലോഗ്ഗില്‍ സജ്ജീവമാണ് )

9. തൊഴില്‍ സഹായ പദ്ധതികള്‍
തൊഴില്‍ ദായകരേയും തൊഴില്‍ അന്വോക്ഷകരേയും സഹായിക്കുക. ബഹറിനിലുള്ള തൊഴില്‍ അവസരങ്ങള്‍ ബൂലോകരെ അറിയിക്കുകയും ബൂലോക തൊഴില്‍ അന്യോക്ഷകരെ സഹായിക്കുകയും ചെയ്യുക.

10.വിവിധ സഹായ പദ്ധതികള്‍
വിദേശത്തു നാട്ടിലുമായി വിവിധ ആവശ്യങ്ങളിലിരിക്കുന്നവരെ സഹായിക്കുക. വിവിധ സഹായ പദ്ധതികള്‍ക്ക്‌ രൂപം നല്‍കുക

ഇതു വായിക്കുന്നവര്‍ ഒരു കമന്റിട്ടാല്‍ വളരെ സന്തോഷം.
നിങ്ങളുടെ നിര്‍‌ദ്ദേശം സ്വീകരിച്ച്‌ ആവശ്യമായ മാറ്റങ്ങള്‍ വരുത്താം

സസ്നേഹം
ബാജി ഓടംവേലി

ബഹറിന്‍ ലിസ്‌റ്റ്‌

2007-08-13T14:37:00.000+03:00

ബഹറിന്‍ മലയാളി ബ്ലോഗ്ഗേയ്‌സ്‌ രണ്ടാമത്‌ കുടുംബസംഗമം
ആഗസ്‌റ്റ്‌ 22 ബുധനാഴ്‌ച വൈകിട്ട്‌ 7 മണിമുതല്‍
മനാമയില്‍ അതിവിപുലമായി നടക്കുന്നു.
ബഹറിനിലുള്ള മലയാളി ബ്ലോഗ്‌ എഴുത്തുകാര്‍ക്കും വായനക്കാര്‍ക്കും സ്വാഗതം.
കൂടുതല്‍ വിവരങ്ങള്‍ക്ക്‌ വിളിക്കുക
രാജു ഇരിങ്ങല്‍ - 36360845
ബാജി ഓടംവേലി – 39258308
ബഹറിനിലുള്ള ബ്ലോഗ്ഗുകളില്‍ ചിലത്‌
1. http://www.manalezhutthu.blogspot.com/ - ബെന്യാമിന്‍
2. http://anilsopanam-souparnika.blogspot.com/ - അനില്‍ സോപാനം
3. http://manumalu143.blogspot.com/ - മനോജ്‌ കുമാര്‍
4. http://prasanthkzy.blogspot.com/ - പ്രശാന്ത്‌ കോഴഞ്ചേരി
5. "ബഹറൈന്‍ ബൂലോക മീറ്റ്‌" - കുഞ്ഞന്‍
6. കാട്ടുപൂവ് - സജി മുട്ടോണ്‍
7. പൊടികൈകള്‍ - ഡാന്‍സ്‌ മമ്മി
8. സ്വപ്നത്തിലെ മുത്തലാഖ് - സജീവ്‌ കടവനാട്‌
9. http://preranabahrain.blogspot.com/2007/08/blog-post.html - പ്രേരണ ബഹറിന്‍
10. http://anjalilibrary.wordpress.com/2007/01/17/355/ - അഞ്ജലി ഗ്രന്ഥശാല
11. http://kevinsiji.goldeye.info/2007/01/06/georgecherian/ - കെവിന്‍ & സിജി
12. http://thiruvilvamala.blogspot.com/ - എം. കെ. നംബിയാര്‍
13. http://olavilam.blogspot.com/ - ജലീല്‍ വക്കീല്‍
14. മണല്‍ - മോഹന്‍ പുത്തന്‍‌ചിറ
15. http://nachikethkrishna.blogspot.com/ - കെവിന്‍ മേണാത്ത്‌
16. http://komathiringal.blogspot.com/2007/07/blog-post_17.html - രാജു ഇരിങ്ങല്
17. കാത്തിരിക്കുന്ന ഫോട്ടോകള്‍ - ബാജി ഓടംവേലി

ബഹറിന്‍ മലയാളി ബ്ലോഗ്ഗേയ്‌സ്‌ കുടുംബസംഗമം

2007-08-08T10:32:00.000+03:00

ബഹറിന്‍ മലയാളി ബ്ലോഗ്ഗേയ്‌സ്‌ രണ്ടാമത്‌ കുടുംബസംഗമം ആഗസ്‌റ്റ്‌ 22 ബുധനാഴ്‌ച വൈകിട്ട്‌ 7 മണിമുതല്‍ മനാമയില്‍ അതിവിപുലമായി നടക്കുന്നു.
വല്ല്യ വല്ല്യ പുലികള്‍‍ പങ്കെടുക്കുമെന്ന്‌ പ്രതീക്ഷിക്കുന്നു.

ബഹറിനിലുള്ള മലയാളി ബ്ലോഗ്‌ എഴുത്തുകാര്‍ക്കും വായനക്കാര്‍ക്കും സ്വാഗതം.

കൂടുതല്‍ വിവരങ്ങള്‍ക്ക്‌ വിളിക്കുക

രാജു ഇരിങ്ങല്‍ - 36360845
ബാജി ഓടംവേലി – 39258308

ജീവിതം

2007-07-30T17:14:00.001+03:00

പണത്തിന്റെ വില
നാം അദ്ധ്വാനിച്ചുണ്ടാക്കുന്ന പണത്തിന്റെ വില മറ്റാരും മനസ്സിലാക്കിയില്ലെങ്കിലും നാം മറക്കരുത്. നമ്മുടെ കുടുംബത്തെ അത് ബോധ്യപ്പെടുത്തണം. എല്ലാത്തിനും അയല്‍‌പക്കക്കാരനുമായി താരതമ്യം ചെയ്യുന്നത് വലിയ അപകടമാണ്. നമ്മുടെ ആവശ്യത്തിന് മതിയാകുന്ന വീട് വെയ്‌ക്കുക, താമസിക്കേണ്ട സമയത്ത് വീട് വെയ്‌ക്കുന്നതാണ് ഉത്തമം. വില കൂടിയ രോഗങ്ങള്‍‌ക്ക് മുന്‍‌പില്‍‌ പണം കയ്യിലില്ലെങ്കില്‍‌ ജീവിതം ബാക്കിയുണ്ടാവില്ല. പണം പണമായിട്ട് കയ്യിലില്ലെങ്കില്‍‌ ആശുപത്രിയില്‍ ബില്ല് അടയ്‌ക്കേണ്ടിവരുമ്പോള്‍ സമ്പാദ്യങ്ങള്‍ കുറഞ്ഞ വിലയില്‍ ഉപേക്ഷിക്കേണ്ടി വരും.

ജീവിതം
വലിയ പ്രശ്നങ്ങളൊന്നും ഇല്ലെന്നതു തന്നെയാകാം നമ്മുടെ പ്രശ്‌നം.
പ്രശ്‌നങ്ങള്‍ ഉണ്ടാകുകയും
മനസ്സുകള്‍ കലുക്ഷിതമാവുകയും ചെയ്യുമ്പോള്‍
ശാന്തിയുടെ തീരത്തെത്തുവാനുളള ആവേശം തോന്നും.
ആ അന്വേഷണമാണ്‍ ജീവിതം.

ആശംസ :- മനസ്സുകള്‍ അസ്വസ്ഥമാകട്ടെ
അസ്വസ്ഥമായ മനസ്സ്, വിതയ്ക്കുവാനായ് ഉഴുതുമറിക്കപ്പെട്ട മണ്ണാണ്‍.

മാനസീകാവസ്ഥ
മനസ്സുകളുടെ അവസ്ഥയാണ്‍ വാക്കുകള്‍ക്ക് അര്‍ത്ഥം നല്‍കുന്നത്
( മാനസീകാവസ്ഥ എന്നു പറഞ്ഞാല്‍ അര്‍ത്ഥം വ്യക്തമാകില്ല )
മാനസീകമായി അടുപ്പമുളളവര്‍ എന്തു പറഞ്ഞാലും നല്ലത് നല്ലത്,
നല്ല അര്‍ത്ഥത്തില്‍ ഉള്‍‌ക്കൊളളും.
മാനസീകമായി അടുപ്പമില്ലാത്തവര്‍,
പറയുന്ന കാര്യത്തിലെ വൈരുദ്ധ്യം കണ്ടെത്താന്‍ തിടുക്കം കൂട്ടും.